رەسەي، ا ق ش جانە ۋكراينا اراسىنداعى كەلىسسوزدىڭ جاڭا كەزەڭى قاراشادا ءوتۋى مۇمكىن
استانا. KAZINFORM - رەسەي پرەزيدەنتى ۆلاديمير پۋتين قاراشا ايىنىڭ ءبىرىنشى جارتىسىندا ا ق ش پەن ۋكراينا قاتىساتىن ءۇشجاقتى كەلىسسوزدەردى قايتا باستاۋعا دايىن ەكەنىن مالىمدەدى، دەپ حابارلايدى تاسس.
بۇل تۋرالى رەسەي باسشىسىنىڭ كومەكشىسى يۋري ۋشاكوۆ سانكت-پەتەربۋرگتە پۋتيننىڭ ا ق ش پرەزيدەنتىنىڭ ارنايى وكىلى ستيۆ ۋيتكوففپەن كەزدەسۋىنىڭ قورىتىندىسى بويىنشا حابارلادى.
كەزدەسۋ ءۇش ساعاتقا جۋىق ۋاقىتقا سوزىلدى. ۋشاكوۆتىڭ ايتۋىنشا، نەگىزگى تاقىرىپ ۋكرايناداعى قاقتىعىستى رەتتەۋ ماسەلەسى بولدى.
— پۋتين ستيۆ ۋيتكوففقا رەسەيدىڭ قاراشا ايىنىڭ العاشقى ونكۇندىگىندە نەگىزگى ماسەلە بويىنشا ءۇشجاقتى كەلىسسوزدەردى قايتا باستاۋعا دايىن ەكەنىن حابارلادى. بۇل ماسەلە رەسەي مەن ۋكراينا ءۇشىن قاۋىپسىزدىك جۇيەسىن قالىپتاستىرۋعا قاتىستى، — دەدى ۋشاكوۆ.
ونىڭ سوزىنشە، تاراپتار رەسەي، ا ق ش جانە ۋكراينا وكىلدەرىنىڭ قاتىسۋىمەن كەلىسسوزدەردى قايتا باستاۋدىڭ ىقتيمال فورماتىن تالقىلاعان.
سونىمەن قاتار ۋيتكوفف رەسەي پرەزيدەنتىنە وسلودا ۋكراينا پرەزيدەنتى ۆلاديمير زەلەنسكيمەن، ەۋروپا ەلدەرىنىڭ، ناتو مەن ەۋروپالىق كوميسسيانىڭ وكىلدەرىمەن وتكەن كەلىسسوزدەردىڭ قورىتىندىلارى تۋرالى اقپارات بەرگەن.
ۋشاكوۆتىڭ ايتۋىنشا، تاراپتار تۇراقتى بەيبىتشىلىككە قول جەتكىزۋ جولدارى جونىندە دە پىكىر الماستى.
كەلىسسوزدەرگە بەينەبايلانىس ارقىلى دجارەد كۋشنەر دە قاتىستى. دەنساۋلىعىنا بايلانىستى ول سانكت-پەتەربۋرگكە كەلە المادى.
رەسەي پرەزيدەنتىنىڭ كومەكشىسى كەزدەسۋدى مازمۇندى ءارى اشىق ءوتتى دەپ سيپاتتادى.
دجارەد كۋشنەر ۋكراينا ماسەلەسى بويىنشا كەلىسسوزدەردە «ءۇمىت ۇيالاتاتىن ىلگەرىلەۋشىلىككە» قول جەتكىزىلگەنىن مالىمدەدى. ول بۇل تۋرالى «x» الەۋمەتتىك جەلىسىندەگى پاراقشاسىندا جازدى.
- ءالى دە اتقارىلاتىن جۇمىس كوپ. الايدا بىزدە بۇل سوعىستى ەڭسەرىپ، كەلەسى ۇرپاقتارعا ۇزاق مەرزىمدى بەيبىتشىلىك، قاۋىپسىزدىك پەن وركەندەۋدىڭ نەگىزىن قالاۋ ءۇشىن ناقتى مۇمكىندىك بار، - دەپ اتاپ ءوتتى ول.
بۇعان دەيىن ۆلاديمير پۋتيننىڭ كەزدەسۋ بارىسىندا ا ق ش پرەزيدەنتى دونالد ترامپتىڭ ارنايى وكىلىنە رەسەي مەن ۋكراينا اراسىنداعى قاقتىعىس ماسەلەسىنە كوڭىل بولگەنى ءۇشىن العىس ايتقانى حابارلانعان بولاتىن.
