رەسپۋبليكالىق جولدارعا كۇن ساۋلەسىنەن قۋات الاتىن باتارەيالار ورناتىلىپ جاتىر
استانا. KAZINFORM - رەسپۋبليكالىق ماڭىزداعى «دوسسور- قۇلسارى- بەينەۋ- سايوتەس- شەتپە- جەتىباي- اقتاۋ» اۆتوموبيل جولى جەلىسىنىڭ ماڭعىستاۋ اۋدانىنا قاراستى جارمىش، بەكى اۋىلدارى، سايوتەس اۋىلى ماڭىنا، ماناتا اسۋىنا 300 دانا كۇن ساۋلەسىنەن قۋات الاتىن باتارەيالار ورناتۋ جۇمىستارى جۇرگىزىلىپ جاتىر.
بۇل تاۋلىكتىڭ تۇنگى مەزگىلىندە جول-كولىك وقيعالارىنىڭ الدىن الۋعا ىقپال ەتەدى.
سونىمەن قاتار، جول ۋچاسكەلەرىنە جاقىن جايىلىمدارى بار مال شارۋاشىلىقتارى ورنالاسقان جەرلەرگە جانۋارلاردىڭ قاتىسۋىمەن بولاتىن جول-كولىك وقيعالارىن الدىن الۋ ءۇشىن، ماڭعىستاۋ جانە بەينەۋ اۋداندارىنا قاراستى تولەپ اۋىلى، 5 بەكەت، 6 بەكەت، «قاراقۇدىق» كەن ورنى بۇرىلىسىنا، 7 بەكەت، سايوتەس اۋىلى ماڭى جانە دە جەتىباي-اقتاۋ باعىتىنداعى مۇنايشى اۋىلى ماڭىنا جالپى ۇزىندىعى 40 شاقىرىمدى مال ءوتۋىن بولدىرمايتىن سىم قورشاۋلارىن ورناتۋ جۇمىستارى باستالدى.
جاياۋ جۇرگىنشىلەردىڭ قاتىسۋىمەن بولاتىن جول- كولىك وقيعالارىن الدىن الۋدا، شەتپە، بەينەۋ ەلدى مەكەندەرىندە 2 پروەكتسيالىق جاياۋ جۇرگىنشىلەر وتكەلى ورناتىلدى. جىل سوڭىنا دەيىن «جەتىباي- اقتاۋ» اۆتوجول ۋچاسكەسىندە باتىر اۋىلى ماڭىندا قوسىمشا 3 پروەكتسيالىق جاياۋ جۇرگىنشىلەر وتكەلىن ورناتۋ جۇمىستارىن جۇرگىزۋ جوسپارلانىپ وتىر.
«قازاۆتوجول» ۇ ك» ا ق» ماڭعىستاۋ وبلىستىق فيليالى مالىمەتىنشە، رەسپۋبليكالىق ماڭىزداعى «بەينەۋ- اقجىگىت- وزبەكىستان رەسپۋبليكاسى شەكاراسى اقىلى اۆتوموبيل جولىندا سىڭعىرلاۋ، اقجىگىت، تاجەن اۋىلدارى ماڭىندا ۇزىندىعى 6 شاقىرىم مال ءوتۋىن بولدىرمايتىن سىم قورشاۋلارى جانە دە 60 دانا كۇن ساۋلەسىنەن قۋات الاتىن باتارەيالارىمەن جارىقتاندىرۋ باعاندارى ورناتىلدى.
جىل سوڭىنا دەيىن جول قوزعالىسىنا قاتىسۋشىلارعا قولايلى جاعداي جاساۋ ءۇشىن، 1 سانيتارلىق- گيگيەنالىق توراپ ورناتۋ جوسپارلانىپ وتىر.
اۆتور
ەلميرا ورالبايەۆا
