پرەمەر-مينيستر حالىقارالىق ساراپشىلاردىڭ ەكونوميكالىق دامۋ جونىندەگى ۇسىنىستارىن تالداۋدى تاپسىردى
استانا. KAZINFORM- ەكونوميكالىق دامۋدىڭ وزەكتى ماسەلەلەرى بويىنشا حالىقارالىق ساراپشىلاردىڭ ۇسىنىستارىن تالقىلاۋ قورىتىندىسىندا پرەمەر-مينيستر جاۋاپتى مەملەكەتتىك ورگاندار مەن ۇيىمدارعا ايتىلعان ۇسىنىستارعا تالداۋ جۇرگىزۋدى تاپسىردى، دەپ حابارلايدى ۇكىمەتتىڭ باسپا ءسوز قىزمەتى.
وتىرىس بارىسىندا قاتىسۋشىلار الەمدىك نارىقتارداعى قازىرگى احۋال، ەكونوميكالىق ءوسىمدى ىنتالاندىرۋ شارالارىنىڭ تيىمدىلىگىن ارتتىرۋ جانە حالىقتىڭ ءال- اۋقاتىنىڭ تۇراقتى وسۋىنە جاعداي جاساۋ ماسەلەلەرى بويىنشا پىكىر الماستى.
اڭگىمە بارىسىندا ەكونوميكا قۇرىلىمىن نىعايتۋ جانە شيكىزاتتىق ەمەس سەكتوردى ءارتاراپتاندىرۋ، قازاقستاننىڭ ونەركاسىپتىك ساياساتىن جەتىلدىرۋ جونىندەگى باستامالار ءسوز بولدى. ساراپشىلار شەتەلدىك ينۆەستيتسيالار اعىنىن كوبەيتۋ جانە جەكە كاسىپكەرلىكتى دامىتۋ ءۇشىن قولايلى جاعدايلار جاساۋ تاسىلدەرىن ۇسىندى.
- سونداي-اق وڭىرلەردىڭ ونەركاسىپتىك ماماندانۋىن دامىتۋعا، ەكسپورتتىق الەۋەتتى كەڭەيتۋگە جانە ستراتەگيالىق ينۆەستورلاردى تارتۋعا نازار اۋدارىلدى. بۇدان بولەك، جەكە كاپيتالدىڭ قاتىسۋىن كەڭەيتۋ ماسەلەلەرى تالقىلاندى، - دەلىنگەن حابارلامادا.
وسىعان دەيىن كەلەر جىلى قازاقستان ەكونوميكاسى قانشالىقتى ءوسۋى مۇمكىن دەگەن تاقىرىپتى ساراپتاعان ەدىك.
