پرەمەردىڭ الماتى وبلىسى اكىمىنە ەسكەرتۋى: قارجى تولىق يگەرىلمەسە، قىسقارتامىز

استانا. KAZINFORM - پرەمەر-مينيستر ولجاس بەكتەنوۆ الماتى وبلىسىنىڭ اكىمى مارات سۇلتانعازيەۆكە بولىنگەن قاراجات تولىق يگەرىلمەسە قىسقارتىلاتىندىعىن ەسكەرتتى.

بۇگىن ۇكىمەت وتىرىسىندا پرەمەر-مينيستر الماتى وبلىسىنىڭ اكىمىنەن: «بىلتىر وڭىرگە اۋىلدىق جەرلەردە 86 جوبانى ىسكە اسىرۋعا شامامەن 21 ميلليارد تەڭگە ءبولىندى. ءبىراق، ونىڭ تەك 90 پايىزى عانا يگەرىلگەن. نەگە جۇمىس باياۋ ءجۇرىپ جاتىر؟» - دەپ سۇراعان ەدى.

ءوڭىر اكىمىنىڭ ايتۋىنشا، الماتى وبلىسى بويىنشا «اۋىل - ەل بەسىگى» جوباسى اياسىندا 2023 -جىلى 20,9 ميلليارد تەڭگەگە 86 جوبانى جۇزەگە اسىرۋ جوسپارلانعان. ونىڭ 63 جوباسى وتكەن جىلى اياقتالىپ، 23 جوباسى وسى جىلعا اۋىسىپ وتىر.

«2024 -جىلدىڭ 1-قاڭتارىنداعى دەرەككە سايكەس، قارجىنى يگەرۋ 18,6 ميلليارد تەڭگەنى قۇرادى. يگەرمەۋ كولەمى - 2,3 ميلليارد تەڭگە. قاراجاتتىڭ يگەرىلمەۋ سەبەپتەرى كەلەسىدەي: 1,9 ميلليارد تەڭگەگە جۇمىس كەستەسىنەن ارتتا قالۋ (4 مەكەمەگە ايىپپۇل سالىندى)، 290 ميلليون تەڭگە ۇزاققا سوزىلعان سوت پروتسەستەرى (1 مەكەمە بويىنشا)، 164 ميلليون تەڭگە مەملەكەتتىك ساتىپ الۋ بويىنشا ۇنەمدەۋ، 61 ميلليون تەڭگە قۇرىلىس ماتەريالدارىنىڭ قىمباتتاۋىنا بايلانىستى جوبالىق- سمەتالىق قۇجاتتامانى تۇزەتۋ. وتكەن جىلى اياقتالماعان جوبالار بيىل جۇزەگە اسىرىلادى. جالپى، 2024-جىلى 14,1 ميلليارد تەڭگەگە 84 جوبانى ىسكە اسىرۋ جوسپارلانعان. ناتيجەسىندە قۇرىلىس جانە جوندەۋ جۇمىستارى كەلەسى سالالاردا جۇرگىزىلەدى: جول ينفراقۇرىلىمى، ءبىلىم بەرۋ، تۇرعىن ءۇي كوممۋنالدىق شارۋاشىلىق، مادەنيەت، دەنساۋلىق ساقتاۋ»، - دەدى مارات سۇلتانعازييەۆ.

وسى ورايدا ۇكىمەت باسشىسى بولىنگەن قاراجات تولىعىمەن يگەرىلۋى تيىستىگىن باسا ايتتى.

«بولىنگەن قاراجات تولىعىمەن يگەرىلۋى ءتيىس. بولماسا قىسقارتامىز. وسى جەردە قارجى ءمينيسترى وتىر. دۇرىستاپ قاراڭىزدار»، - دەدى ولجاس بەكتەنوۆ.

اۆتور

مارلان جيەمباي