پرەمەر-مينيستر الماتىداعى جەر سىلكىنىسىنە قاتىستى پىكىر ءبىلدىردى
استانا. KAZINFORM - ۇكىمەت باسشىسى ولجاس بەكتەنوۆ كەشەگى الماتىدا بولعان جەر سىلكىنىسىنە قاتىستى پىكىر ءبىلدىرىپ، قۇزىرلى ورگاندارعا تاپسىرما جۇكتەدى.
«توتەنشە جاعدايلار مينيسترلىگى، اكىمدىك جانە باسقا دا مەملەكەتتىك ورگاندار بولعان جاعدايعا قاتىستى شۇعىل ارەكەت ەتە ءبىلدى. بۇل جولى دابىل مەن حالىقتى قۇلاقتاندىرۋ جۇيەسى ۋاقتىلى ىسكە قوسىلدى. قالا حالقى قابىلداۋ پۋنكتىلەرىنە ەۆاكۋاتسيالاندى. باعىمىزعا وراي، ايتارلىقتاي زارداپتار بولعان جوق»، - دەدى ولجاس بەكتەنوۆ.
پرەمەر- ءمينيستردىڭ ايتۋىنشا، قازىر جاعدايدى ەسەپتەۋ-باعالاۋ جۇمىستارى جالعاسىپ جاتىر. سونداي-اق ۇكىمەت باسشىسى توتەنشە جاعدايلار مينيسترلىگى ەلدەگى سەيسمولوگيالىق احۋالعا تۇراقتى مونيتورينگتى قامتاماسىز ەتۋى كەرەكتىگىن ايتتى.
«كۇشتەر مەن قۇرالدار ساقاداي ساي بولۋعا ءتيىس. حالىقپەن اقپاراتتىق ءتۇسىندىرۋ جۇمىستارىن جالعاستىرۋ قاجەت. سونىمەن قاتار توتەنشە جاعدايلار مينيسترلىگى ەلىمىزدىڭ تاۋلى ايماقتارىندا سەل جانە لاي كوشكىنى ءجۇرۋ قاۋىپىنە قاتىستى ءتيىستى مونيتورينگتى قامتاماسىز ەتۋى ءتيىس»، - دەدى ول.
ودان بولەك، ولجاس بەكتەنوۆ توتەنشە جاعدايدا جەدەل ارەكەت ەتۋ شارالارىن قابىلداۋدى تاپسىردى.
اۆتور
داۋلەت ىزتىلەۋ
