پرەمەر-ءمينيستردىڭ ورىنباسارى مەن ت ج م باسشىسى ب ق و- عا باردى

استانا. KAZINFORM - باتىس قازاقستان وبلىسىندا جايىق وزەنىندەگى سۋ دەڭگەيى قاۋىپتى شەكتەن اسىپ بارادى. بۇل تۋرالى ب ق و اكىمدىگى باسپا ءسوز قىزمەتىنىڭ باسشىسى ەرحان تاتكەن ايتتى.

«باتىس قازاقستان جاعداي ءالى دە كۇردەلى. تاڭەرتەڭگى اقپارات بويىنشا جايىق وزەنىندەگى سۋ دەڭگەيى 852 سانتيمەترگە جەتتى. ياعني قاۋىپتى دەڭگەيدەن اسىپ بارادى. بۇل تۇرعىدا ورال قالاسى مەن وڭىردەگى اقجايىق، ءبورلى، تەرەكتى، بايتەرەك اۋداندارىندا تاسقىنعا قارسى جۇمىستار كۇشەيتىلگەن رەجيمدە ىسكە اسىرىلىپ جاتىر»، - دەدى ە. تاتكەن ورتالىق كوممۋنيكاتسيالار قىزمەتىندەگى بريفيفنگىدە.

ونىڭ ايتۋىنشا، ءدال قازىر وڭىرگە پرەمەر-ءمينيستردىڭ ورىنباسارى قانات بوزىمبايەۆ پەن توتەنشە جاعدايلار ءمينيسترى شىڭعىس ءارىنوۆ كەلدى. ولار باتىس قازاقستان وبلىسىنىڭ اكىمى ناريمان تورەعاليەۆپەن بىرگە وڭىردەگى سۋ باسۋ قاۋپى بار اۋماقتارىن ارالايدى.

«قازىر وبلىستا 13 مىڭنان استام ادام (سونىڭ 6 مىڭى بالا) قاۋىپسىز جەرگە كوشىرىلدى. جالپى، وڭىردەگى ءتيىستى قۇرىلىمدار كۇشەيتىلگەن رەجيمدە جۇمىس ىستەپ جاتىر. وبلىسقا 10 مىڭنان استام تەحنيكا، سونىڭ ىشىندە 2 مىڭنان استام ارنايى تەحنيكا جۇمىلدىرىلدى. اتاپ ايتقاندا، 11 مىڭنان استام ادام سۋ تاسقىنىنا قارسى جۇمىستاردى اتقارىپ جاتىر»، - دەدى باسپا ءسوز حاتشىسى.

بۇدان بۇرىن حابارلانعانداي، بۇگىن ق ر توتەنشە جاعدايلار مينيسترلىگى وكىلى اسقار ءشارىپ ەلىمىزدە اۆاريالىق- قۇتقارۋ جانە سۋ تاسقىنىنا قارسى جۇمىستارعا 36,5 مىڭ ادام جۇمىلدىرىلعانىن ايتتى.

اۆتور

رۋسلان عابباسوۆ