ەرمەك تۇرسىنوۆ 500 ميلليون تەڭگە الىپ، كينو تۇسىرمەگەن - مينيسترلىك

استانا. KAZINFORM - مادەنيەت جانە اقپارات مينيسترلىگى «كينەماتوگرافيا تۋرالى» زاڭىمەن رەتتەلەتىن وتاندىق كينويندۋستريانى قولداۋ ءۇشىن ناقتى شارالار قابىلداۋدا.

الايدا، مينيسترلىك جۇرگىزگەن تالداۋ ناتيجەسى بويىنشا، كينوگەرلەردىڭ دەنى ساپالى ءونىم شىعارۋعا جانە ونى ناسيحاتتاۋعا مۇددەلى ەمەس، دەپ حابارلايدى مينيسترلىكتىڭ باسپا ءسوز قىزمەتى.

باسپاءسوز قىزمەتىنىڭ مالىمەتتەرىنە قاراعاندا، «ۇلتتىق كينونى قولداۋ ورتالىعى» مەملەكەتتىك قارجىلاي قولداۋ بەرۋ ءۇشىن اشىق كونكۋرستار ۇيىمداستىرىپ، ولاردى ىرىكتەۋمەن اينالىسادى.

«كينو ورتالىعى جۇمىس ىستەگەن 5 جىل ىشىندە 103 جوباعا قارجى بولىنگەن، جالپى قۇنى 19 ميلليارد تەڭگە تۇراتىن ءتۇرلى جانردا 98 فيلم ءتۇسىرىلدى. ونىڭ ىشىندە 42 كوركەم، 23 دەرەكتى، 25 قىسقامەتراجدى، 8 انيمتسيالىق فيلم بار. كينوتەاترلارعا، تەلەۆيزيالىق جانە ونلاين پروكاتقا تەك 23 كارتينا شىققان (كوركەم فيلم – 20، دەرەكتى فيلم - 3). 2023-جىلعا دەيىن تۇسىرىلگەن 27 فيلم بيىل كورسەتىلمەك. سونىمەن قاتار پروكاتتى ۇيىمداستىرۋ ءۇشىن، مينيسترلىكتەن پروكات كۋالىگىن الۋ عانا جەتكىلىكتى ەكەنىن ەسكەرۋ قاجەت. ءبىراق وسىعان دەيىنگى تاجىريبە كورسەتكەندەي، رەجيسسەرلەردىڭ كوبى فەستيۆالدار مەن كونكۋرستارعا ارناپ فيلمدەر تۇسىرەدى نەمەسە اۆتورلىق كينو دايىندايدى. وسىلايشا وزدەرىنىڭ جەكە شىعارماشىلىق امبيتسيالارىنا باسىمدىق بەرىپ، كوپشىلىك اۋديتوريا سۇرانىسىن ۇمىتىپ كەتىپ جاتادى. كاسسالىق جيناق كولەمى نەبارى 1,5 ميلليارد تەڭگەگە جەتكەن، بۇل ۇلتتىق فيلمدەر پروكاتىنىڭ تومەندىگىن ايقىن كورسەتەدى» ، - دەلىنگەن حابارلامادا.

سونداي-اق وندا قازاقستاندىق كورەرمەننىڭ ءالى كۇنگە دەيىن كەي كارتينالاردى كورمەۋىنىڭ باستى سەبەبى - وندىرۋشىلەر مەن اۆتورلاردىڭ پروكاتقا شىعارۋعا دەگەن نيەتىنىڭ جوقتىعى ەكەنى ايتىلعان. ويتكەنى ولار ءوز قالاماقىسىن جوبا بارىسىندا-اق الىپ قويعان.

ماسەلەن، «تۇرسىنوۆ فيلم» ج ش س جەتەكشىسى رەجيسسەر، جازۋشى ەرمەك تۇرسىنوۆ 2019-جىلدان 2021-جىلعا دەيىن «بەسمويناق» تولىقمەتراجدى كوركەم فيلمىن شىعارۋعا 500 ميلليون تەڭگە كولەمىندە مەملەكەتتىك قارجى الدى. ءبىراق كورەرمەن فيلمدى وسى ۋاقىتقا دەيىن كورگەن جوق.

«باتۋ. تاريحي دەتەكتيۆ» اتتى كينورەجيسسەر راشيد نۇعمانوۆتىڭ كينوسىنا 192 ميلليون تەڭگە بولىنگەن. جوبا 2021 -جىلى اياقتالعان، ءبىراق قالىڭ كورەرمەن بۇل فيلممەن دە تانىس ەمەس.

كينورەجيسسەر دامير مانابايدىڭ «تىرنالار» جوباسى 422 ميلليون تەڭگە كولەمىندە مەملەكەتتىك قولداۋعا يە بولدى.

رەجيسسەر ارداق ءامىرقۇلوۆتىڭ «حيرۋرگ» فيلمىن شىعارۋعا 239 ميلليون تەڭگە ءبولىندى، كينوتەاترلارداعى كاسسالىق جيناق 1,1 ميلليون تەڭگە بولدى.

رەجيسسەر اقان ساتايەۆتىڭ «بوكسەر» فيلمىن قارجىلاندىرۋ 900 ميلليون تەڭگەنى قۇرادى، كينوپروكاتتان جيناعانى 25 ميلليون تەڭگەدەن اسپادى.

رەجيسسەر ەمير بايعازيننىڭ «جيزن» كارتيناسىنا 500 ميلليون تەڭگە كولەمىندە مەملەكەتتىك قارجى ءبولىندى، فيلم پروكاتتا 650 مىڭ تەڭگە جينادى.

رەجيسسەر بەكبولات شەكەروۆتىڭ «لەتو 1941-گو گودا» كوركەم فيلمىن تۇسىرۋگە 697 ميلليون تەڭگەدەن استام قاراجات ءبولىندى. كاسسادا تۋىندى تەك 40,6 م ميلليون تەڭگە.

رەجيسسەر ەرنار نۇرعاليەۆتىڭ دە «نا ستارتە» فيلمى وسىنداي. مەملەكەتتەن 468,5 ميلليون تەڭگە ءبولىندى، پروكاتتا بار بولعانى 15,5 ميلليون تەڭگە نەمەسە بيۋدجەتتىڭ %3,3- ىن جينادى.

رەجيسسەر فارحات شاريپوۆتىڭ «سحەما» كارتيناسى نەبارى 21,8 ميلليون تەڭگە جيناي الدى، ال ونى وندىرۋگە 300 ميلليون تەڭگە ءبولىندى.

340 ميلليون تەڭگەگە تۇسىرىلگەن «بۇركىت» فيلمى نەبارى 254 مىڭ تەڭگە جينادى.

جوبالاردى ىسكە اسىرۋ ءۇشىن مەملەكەت بولەتىن سوماعا %10 مولشەردە رەجيسسەرلەردىڭ گونورارى دا تولەنگەنىن قوسا كەتكەن ءجون.

جەكە كينوكومپانيالار وزدەرىنىڭ كينوكارتينالارىن ودان ءارى پروكاتقا شىعارۋ مەن تاراتۋ ماسەلەسىنە بەي-جاي قارايدى، ءبىراق باسقا جوبالار ارقىلى كينو ورتالىعىنىڭ اشىق كونكۋرستارىنا قاتىسۋدى جالعاستىرۋدا جانە مەملەكەتتىك قولداۋعا يە بولىپ جاتىر. بايقاۋدان وتپەگەن جاعدايدا ولار نارازىلىق كورسەتىپ، جوبالاردى تاڭداۋداعى وبەكتيۆتىلىك پەن اشىقتىققا كۇمان كەلتىرەدى، كينەماتوگرافيستەردى ميتينگكە شىعارامىن دەپ قورقىتۋ ارقىلى كونكۋرس ناتيجەسىن ءوز جاعىنا بۇرعىسى كەلەدى.

ءدال وسىنداي جاعداي مۋلتيپليكاتسيا جانە انيماتسيا سالاسىندا دا بايقالادى. 2019-جىلدان بەرى جاسالعان انيماتسيالىق فيلمدەردىڭ ەشقايسىسى قازاقستاندىق كورەرمەنگە ءالى كۇنگە ۇسىنىلعان جوق.

ماسەلەن، «ADAY Production» ج ش س- نىڭ «كەنجە قىز» تۋىندىسىنا 232,8 ميلليون تەڭگە بولىنگەن، «ىرىسى ا ق قازاقستان» ج ش س تاسپالاعان «كاراۆان يستوري» مۋلتفيلمىنە 213,9 ميلليون تەڭگە كولەمىندە قولداۋ كورسەتىلسە، «Dala Animation» ج ش س- نىڭ «بەسىك جىرىنا» 32,4 ميلليون تەڭگە بەرىلگەن.

وسىعان بايلانىستى ۆەدومستۆو وسى يندۋستريانى دامىتۋ تاسىلدەرىن وزگەرتۋ جانە كينەماتوگرافيستەرگە قولداۋ كورسەتۋ شارتتارىن قايتا قاراۋ تۋرالى شەشىم قابىلدادى. سونداي-اق كونكۋرستىق ىرىكتەۋ كەزىندە فيلم اۆتورلارى مەن كينوكومپانيالاردىڭ كورەرمەنگە كورسەتىلگەن جوباسىنىڭ ساپاسى مەن ناتيجەسى ەسكەرىلەتىن بولادى.

مينيسترلىكتىڭ نەگىزگى مىندەتى - فيلمدەر شىعارۋ كەزىندە زاڭدىلىق پەن ءتارتىپتى قامتاماسىز ەتۋ.

ۆەدومستۆو شىعارماشىلىق ەركىندىكتى قۇرمەتتەيدى، ءبىراق زاڭ مەن ءتارتىپ بارىنە ورتاق جانە ءسوزسىز ساقتالۋى كەرەك.

سونداي- اق، مينيسترلىك قازىر جاعدايى اقساپ تۇرعان «قازاقفيلم» مەملەكەتتىك كينوستۋدياسىنا بارلىق قاجەتتى كومەك كورسەتىلۋ قاجەت دەپ سانايدى.

كينو قاۋىمداستىقپەن بىرلەسىپ ۇسىنىلاتىن كينەماتوگرافيا سالاسىنداعى، ونىڭ ىشىندە «قازاقفيلمگە» قاتىستى زاڭنامالىق تۇزەتۋلەر ەلدەگى كينويندۋستريانىڭ تۇراقتىلىعى مەن دامۋىن قامتاماسىز ەتۋ ءۇشىن قاجەت.

كينوستۋدياعا كينو ورتالىعىنىڭ كونكۋرسىنا قاتىسپاي-اق، قارجىلىق قولداۋ كورسەتۋ ۇلتتىق كينونى قولداۋ ءۇشىن قاجەتتى قادام بولار ەدى. بۇل ستۋدياعا مەملەكەتتىك تاپسىرمالاردى ىسكە اسىرۋعا، ساپالى فيلمدەر شىعارۋعا جانە قازاقستان مادەنيەتى مەن تاريحىن ىلگەرىلەتۋگە مۇمكىندىك بەرەدى.

ۇسىنىلىپ وتىرعان قارجىلاندىرۋ مەحانيزمى جەكە كينوكومپانيالار اراسىندا كينوجوبالاردى كونكۋرستىق ىرىكتەۋدى جالعاستىرۋعا مۇمكىندىك بەرەدى. وسىلايشا، كينەماتوگرافيالىق يندۋستريادا باسەكەلەستىك ورتا قالىپتاسادى.

«قازاقفيلمنىڭ» تۇراقتى جۇمىس ىستەۋى ۇلتتىق جانە حالىقارالىق ستاندارتتارعا سايكەس كەلەتىن ساپالى فيلمدەر شىعارۋعا مۇمكىندىك بەرەدى. بۇل قازاقستاندىق كينەماتوگرافيانىڭ الەمدىك ارەناداعى ورنىن نىعايتۋعا جانە دارىندى قازاقستاندىق كينەماتوگرافيستەردىڭ جولىن اشۋعا جاعداي جاسايدى»، -دەپ جازدى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى.

اۆتور

ايدار وسپاناليەۆ