ەرمەك مارجىقپايەۆ پاريج وليمپياداسىنا دايىندىق تۋرالى: جاعدايىمىز ءماز ەمەس

استانا. KAZINFORM - تۋريزم جانە سپورت ءمينيسترى ەرمەك مارجىقپايەۆ پاريج وليمپياداسىنا ۇتىپ الىنعان ليتسەنزيانىڭ سانى از ەكەنىن مويىندادى.

«پاريجدەگى XXXIII جازعى وليمپيادا ويىندارىنا قازاقستان قۇراماسى سپورتتىڭ 18-20 تۇرىنەن قاتىسۋدى جوسپارلاپ وتىر. وسى تۇستا ايتا كەتۋ كەرەك، بيىل وليمپياداعا ارنايى اقشا بولىنگەن جوق. بىلتىرعى قاراجاتپەن شىعىپ جاتىرمىز»، - دەدى ول.

ايتۋىنشا، قازاقستان قۇراماسىنىڭ قولىندا قازىر سپورتتىڭ 13 ءتۇرى بويىنشا 33 ليتسەنزيا بار.

«بىزدەن ءبارى قانشا جۇلدە الاتىنىمىزدى سۇرايدى. شىنى كەرەك، جاعدايىمىز ءماز ەمەس. ويتكەنى توكيو وليمپياداسىنىڭ الدىندا بىزدە 45 ليتسەنزيا بولعان.

ۇلتتىق قۇراما وليمپياداعا دەيىن تاعى 40-تان استام ليتسەنزيالىق جانە رەيتينگتىك جارىستارعا قاتىسادى. قولدان كەلگەندى جاساپ جاتىرمىز»، - دەدى ول.

اۆتور

ەسىمجان ناقتىباي