ەرليكايا: تۇركياداعى زاڭسىز نارازىلىقتار كەزىندە 123 پوليتسيا قىزمەتكەرى جارالاندى
استانا. KAZINFORM - تۇركيادا سوڭعى كۇندەرى كەيبىر توپتار جينالىس پەن شەرۋ وتكىزۋ قۇقىعىن اسىرا پايدالانىپ، پوليتسيا قىزمەتكەرلەرىنە شابۋىل جاساپ، ازاماتتاردىڭ قاۋىپسىزدىگىن بۇزىپ، قوعامدىق تارتىپكە قايشى ارەكەتتەندى.
تۇركيانىڭ ىشكى ىستەر ءمينيسترى الي ەرليكايا «X» الەۋمەتتىك جەلىسىندەگى پاراقشاسىندا وسىلاي جازدى، دەپ حابارلايدى Report.
ونىڭ ايتۋىنشا، 2025 -جىلدىڭ 19-23 -ناۋرىزى ارالىعىنداعى زاڭسىز نارازىلىقتار كەزىندە 123 پوليتسيا قىزمەتكەرى جاراقات العان.
ول پوليتسيا قىزمەتكەرلەرىنە شابۋىل جاساعان، مەملەكەت مۇلكىنە زيان كەلتىرگەن جانە ازاماتتاردىڭ قاۋىپسىزدىگىنە قاۋىپ توندىرەتىن 1133 كۇدىكتى ۇستالعانىن اتاپ ءوتتى. ۇستالعاندار اراسىندا 12 ءتۇرلى تەرروريستىك ۇيىممەن بايلانىسى بار تۇلعالار دا بار.
ەرليكايا جەرلەستەرىن ءتارتىپتى ساقتاۋعا، ساقتىققا، پاراساتتىلىقپەن ارەكەت ەتۋگە شاقىردى.
ايتا كەتەيىك، تۇركياداعى نارازىلىققا بايلانىستى قازاقستاننىڭ تۇركياداعى ەلشىلىگى مالىمدەمە جاسادى.
