ەرلان قوشانوۆ «بەردىبەك ساپاربايەۆ تۇلعاسى» اتتى كونفەرەنسياعا قاتىستى
استانا. KAZINFORM - ءماجىلىس ءتوراعاسى ەرلان قوشانوۆ ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە «بەردىبەك ساپاربايەۆ تۇلعاسى» اتتى رەسپۋبليكالىق عىلىمي-پراكتيكالىق كونفەرەنسياعا قاتىستى.
وندا ب. ساپاربايەۆتىڭ جاقىندارى، قىزمەتتەس سەرىكتەرى مەن شاكىرتتەرى، ۇكىمەت مۇشەلەرى مەن پارلامەنت دەپۋتاتتارى باس قوستى.
الدىمەن ەرلان قوشانوۆ مەملەكەت باسشىسى قاسىم-جومارت توقايەۆتىڭ كونفەرەنسياعا قاتىسۋشىلارعا ارنالعان قۇتتىقتاۋىن وقىپ بەردى.
- بەردىبەك ماشبەك ۇلى - تاۋەلسىز قازاقستاننىڭ قالىپتاسۋىنا جانە دامۋىنا ولشەۋسىز ۇلەس قوسقان كورنەكتى مەملەكەت جانە قوعام قايراتكەرى. ول ءار جىلدارى جوعارى لاۋازىمدى قىزمەتتەردى ابىرويمەن اتقارىپ، ەلىمىزدىڭ ءوسىپ-وركەندەۋىنە زور ەڭبەك ءسىڭىردى. ءبىرقاتار وڭىرگە جانە مەملەكەتتىك ورگاندارعا جەتەكشىلىك ەتىپ، پاراساتتى، ىسكەر ءارى بىلىكتى باسشى رەتىندە تانىلدى. حالىقتىڭ ەرەكشە سىي-قۇرمەتىنە بولەندى. قايراتكەر تۇلعانىڭ ادامي قاسيەتتەرى، كاسىبي بىلىكتىلىگى جانە ادال قىزمەتى - جاس مەملەكەتتىك قىزمەتشىلەرگە ءاردايىم ۇلگى-ونەگە، - دەلىنگەن پرەزيدەنت حاتىندا.
جيىندا پرەمەر-ءمينيستردىڭ ورىنباسارى تامارا دۇيسەنوۆا، پارلامەنت سەناتى ءتوراعاسىنىڭ ورىنباسارى جاقىپ اسانوۆ، پرەزيدەنتتىڭ عىلىم جانە يننوۆاتسيالار ماسەلەلەرى جونىندەگى كەڭەسشىسى كۇنسۇلۋ زاكاريا، شىعىس قازاقستان وبلىسىنىڭ اكىمى ەرمەك كوشەربايەۆ، قازاقستاننىڭ ەڭبەك ەرى قۇرالاي بايمەنوۆا جانە باسقا دا مەملەكەت، قوعام قايراتكەرلەرى ءسوز سويلەپ، بەردىبەك ماشبەك ۇلى تۋرالى جۇرەكجاردى ەستەلىكتەرىمەن ءبولىستى.
كونفەرەنسيادا مەملەكەت جانە قوعام قايراتكەرى جايلى كىتاپتىڭ تۇساۋى كەسىلىپ، تاعىلىمدى ءومىر جولى تۋرالى ارنايى تۇسىرىلگەن فيلم كورسەتىلدى.
اۆتور
ابىلايحان جۇماشيەۆ
