ەرلان قارين ق س ز ي عىلىمي كەڭەسىنىڭ وتىرىسىنا قاتىستى
استانا. KAZINFORM - مەملەكەتتىك كەڭەسشى ەرلان قارين پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتى (ق س ز ي) عىلىمي كەڭەسىنىڭ كەڭەيتىلگەن وتىرىسىنا قاتىستى، دەپ حابارلايدى اقوردا.
جيىندا ينستيتۋتتىڭ 2025 -جىلعا جوسپارلانعان تالداۋ جۇمىسىنىڭ نەگىزگى باعىتتارى مەن ماڭىزدى ءىس-شارالارى تالقىلاندى. اتاپ ايتقاندا، ق س ز ي ەل دامۋىنىڭ ىشكى ساياسي ۇدەرىستەرى مەن ەكونوميكالىق ۇردىستەرىن زەرتتەۋگە، سونداي-اق سىرتقى ساياسي احۋالدى باعامداۋعا باسا ءمان بەرەدى. بۇعان قوسا ينستيتۋت دەرەكتەر بازاسىن قۇرۋ جانە ايماقتارداعى وكىلدىكتەر جەلىسىن كەڭەيتۋ جۇمىستارىنا ايرىقشا نازار اۋدارادى.
مەملەكەتتىك كەڭەسشى پرەزيدەنت قاسىم-جومارت توقايەۆ جىل باسىندا بەرگەن سۇحباتىندا مەملەكەتتىك ساياساتتىڭ نەگىزگى باعىت-باعدارىن ايقىنداپ بەرگەنىن اتاپ ءوتتى.
ەرلان قاريننىڭ ايتۋىنشا، جۇزەگە اسىرىلىپ جاتقان مەملەكەتتىك ساياساتتى ساراپتامالىق-تالدامالىق تۇرعىدان سۇيەمەلدەۋ ىسىندە ق س ز ي ايرىقشا ءرول اتقارادى. سونداي-اق قۇرىلىمنىڭ ايماقتاردى دامىتۋ جونىندە ۇسىنىستار ازىرلەۋ، ەكونوميكالىق رەفورمالاردى ودان ءارى ىلگەرىلەتۋ، گەوساياساتتىڭ جاھاندىق ۇردىستەرىن تالداۋ جانە باسقا دا وزەكتى ءارى سۇرانىسقا يە باعىتتار بويىنشا ماڭىزى زور. ينستيتۋت ساراپشىلارى مەملەكەتتىك ىشكى جانە سىرتقى ساياساتتىڭ نەگىزگى ماقسات-مىندەتتەرىن ساراپشىلار قاۋىمداستىعىنا عانا ەمەس، بارشا جۇرتشىلىققا تۇسىندىرۋگە دە ەرەكشە اتسالىسىپ ءجۇر.
بۇدان بولەك، ەرلان قارين ق س ز ي ەلىمىزدىڭ باستى زياتكەرلىك ورتالىعى رەتىندە شەتەلدىڭ ساراپتامالىق ورتالىقتارىمەن حالىقارالىق دەڭگەيدەگى سەرىكتەستىك بايلانىس ورناتۋ ىسىندە نەگىزگى قۇرىلىم سانالاتىنىن جەتكىزدى.
بۇعان دەيىن ەرلان قارين ەسىرتكى تاسىمالداۋشى جاستاردىڭ جازاسىن جەڭىلدەتۋگە قاتىستى پىكىر ءبىلدىردى.
اينۇر تۋماكبايەۆا
اۆتور
