ەرلان قارين پرەزيدەنتكە ىشكى ساياساتتىڭ نەگىزگى باعىتتارى بويىنشا ەسەپ بەردى
استانا. KAZINFORM - مەملەكەت باسشىسى ۆيتسە-پرەزيدەنتتى قابىلدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ ۆيتسە-پرەزيدەنت ەرلان قاريننىڭ ىشكى ساياساتتىڭ باسىم باعىتتارىن جۇزەگە اسىرۋ، پرەزيدەنت تاپسىرمالارىن ورىنداۋ مەن باستامالارىن ىلگەرىلەتۋ، سونىڭ ىشىندە ءبىرىنشى شاقىرىلعان قۇرىلتايدىڭ العاشقى سەسسياسىنىڭ اشىلۋىندا جانە قازاقستان حالىق كەڭەسىنىڭ ءبىرىنشى سەسسياسىندا ايتىلعان مىندەتتەردى ىسكە اسىرۋ جونىندەگى ەسەبىن تىڭدادى.
اتاپ ايتقاندا، ۆيتسە-پرەزيدەنت كونستيتۋتسيالىق قۇندىلىقتاردى ءتۇسىندىرۋ جانە ناسيحاتتاۋ، «تازا قازاقستان» جوباسىن جۇزەگە اسىرۋ، جاڭا قوعامدىق ەتيكا قالىپتاستىرۋ، «زاڭ مەن ءتارتىپ» قاعيداتىن ىلگەرىلەتۋ، «ادال ازامات» ءبىرىڭعاي تاربيە باعدارلاماسىن ەنگىزۋ بويىنشا اتقارىلعان جۇمىستار جونىندە باياندادى.
سونداي-اق مەملەكەت باسشىسىنا ەتنوسارالىق كەلىسىمدى نىعايتۋ، بالالاردىڭ قۇقىعى مەن مۇددەسىن قامتاماسىز ەتۋ، مەملەكەتتىك اقپاراتتىق ساياساتتى جەتىلدىرۋ سەكىلدى ىشكى ساياساتتىڭ نەگىزگى باعىتتارى جونىندە مالىمەت بەرىلدى.
كەزدەسۋ سوڭىندا پرەزيدەنت كونستيتۋتسيالىق قاعيداتتار مەن قۇندىلىقتار ۇلتتىق بولمىس پەن قوعامدىق مادەنيەتتىڭ اجىراماس بولىگىنە اينالۋعا ءتيىس ەكەنىن اتاپ ءوتىپ، ءبىرقاتار تاپسىرما بەردى.
قاسىم-جومارت توقايەۆتىڭ ايتۋىنشا، پاتريوتيزم، جاۋاپكەرشىلىك، ەڭبەكقورلىق، بىرلىك جانە ازاماتتاردىڭ جاسامپاز ماقساتتار جولىندا جۇدىرىقتاي جۇمىلۋى ەلىمىزدى قارقىندى دامىتۋدىڭ ماڭىزدى العىشارتتارى سانالادى.
بۇعان دەيىن مەملەكەت باسشىسى World Aquatics پرەزيدەنتىن Ⅱ دارەجەلى «دوستىق» وردەنىمەن ماراپاتتاعانىن جازعانبىز.
