ەرلان قارين پرەزيدەنت جولداۋىن ىسكە اسىرۋدىڭ ءۇش نەگىزگى مىندەتىن اتادى

ەڭ الدىمەن ەرلان قارين پرەزيدەنت قاسىم-جومارت توقايەۆتىڭ جولداۋدا كوتەرگەن باستامالارى ەلىمىزدىڭ جاڭا تاريحي كەزەڭدەگى دامۋىنىڭ ىرگەتاسىن قالايتىنىن اتاپ ءوتتى.

- مەملەكەت باسشىسىنىڭ جولداۋى - ماڭىزدى ستراتەگيالىق قۇجات. پرەزيدەنت ۇسىنعان باستامالار كولىك ينفراقۇرىلىمى مەن ەنەرگەتيكادان باستاپ، سيفرلاندىرۋ جانە اگرارلىق سەكتورعا دەيىنگى ءتۇرلى سالالارداعى مەملەكەتتىك ساياساتتىڭ ىرگەلى باسىمدىقتارىن ايقىندايدى. وسىلايشا، مەملەكەت باسشىسى بەلگىلەگەن ناقتى مىندەتتەر الداعى بىرنەشە جىلعا ارنالعان جالپىۇلتتىق كۇن ءتارتىبىن قالىپتاستىرادى. اتاپ ايتقاندا، بۇلار - حالىقتىق قۇرىلىس، سيفرلىق ەكونوميكانى كەزەڭ-كەزەڭىمەن قالىپتاستىرۋ، مەملەكەتتىك باسقارۋ جۇيەسىن اۋقىمدى رەفورمالاۋ جانە باسقا دا باستامالار، - دەدى ەرلان قارين.

ۆيتسە- پرەزيدەنتتىڭ ايتۋىنشا، ءتيىستى مەملەكەتتىك ورگاندار پرەزيدەنت باستامالارى مەن تاپسىرمالارىن ساپالى ورىنداۋعا باسا نازار اۋدارۋعا ءتيىس.

- مەملەكەت باسشىسىنىڭ كوپتەگەن باستاماسى ستراتەگيالىق سيپاتقا يە ارى ميلليونداعان ازاماتتىڭ وزەكتى ماسەلەلەرىن شەشۋگە باعىتتالعان. سوندىقتان پرەزيدەنت تاپسىرمالارىنىڭ ەداۋىر بولىگى الەۋمەتتىك ينفراقۇرىلىمدى جاڭعىرتۋعا جانە ونىڭ قولجەتىمدىلىگىن قامتاماسىز ەتۋگە، ەڭ تومەنگى جالاقىنى ارتتىرۋعا، ينفلياتسيامەن كۇرەسۋگە، ءادىل سالىق ساياساتىن جۇرگىزۋگە، شاعىن جانە ورتا بيزنەستى، مۇعالىمدەر مەن مەديتسينا قىزمەتكەرلەرىن قولداۋعا، ينكليۋزيۆتى دامۋدى قامتاماسىز ەتۋگە جانە باسقا دا ماڭىزدى مىندەتتەرگە باعدارلانعان. ينفراقۇرىلىمدى اۋقىمدى جاڭارتۋ باعدارلاماسىنىڭ جولداۋدا «حالىقتىق قۇرىلىس» دەپ اتالۋى كەزدەيسوق ەمەس. ويتكەنى بارلىق نىسان حالىقتىڭ جانە كەلەر ۇرپاقتىڭ يگىلىگىنە قىزمەت ەتەدى. بۇل باعدارلامانىڭ ءمانى مەن ماقساتىن تۇسىندىرەتىن وتە ماڭىزدى جايت، - دەدى ەرلان قارين.

كەڭەس قورىتىندىسى بويىنشا ۆيتسە-پرەزيدەنت ءتيىستى مەملەكەتتىك ورگانداردىڭ الدىنا مەملەكەت باسشىسىنىڭ جولداۋىن ىسكە اسىرۋعا قاتىستى الدىڭعى كەزەكتەگى مىندەتتەردىڭ ءۇش نەگىزگى باعىتىن بەلگىلەدى.

ءبىرىنشى مىندەت - مەملەكەت باسشىسىنىڭ تاپسىرمالارىن جۇيەلى ىسكە اسىرۋ جونىندەگى ستراتەگيالىق قۇجاتتار مەن جوسپارلاردى ۋاقتىلى ازىرلەۋ.

ەكىنشى مىندەت - پرەزيدەنتتىڭ الەۋمەتتىك ماڭىزى بار باستامالارىن زاڭنامالىق تۇرعىدان ساپالى قامتاماسىز ەتۋ.

ءۇشىنشى مىندەت - ءتيىمدى اقپاراتتىق-ءتۇسىندىرۋ جۇمىسىن ۇيىمداستىرۋ.

ۆيتسە-پرەزيدەنت وسى مىندەتتەردى ناتيجەلى ورىنداۋ ءۇشىن مەملەكەتتىك اپپاراتتى بەلسەندى ءارى ۇيلەسىمدى جۇمىس ىستەۋگە شاقىردى.

ايتا كەتەيىك، بۇگىن پرەزيدەنت قاسىم-جومارت توقايەۆ قۇرىلتاي وتىرىسىندا «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن جاريالادى.