ەرلان قارين: قازاقستان ءوزىنىڭ تاريحي جانە رۋحاني مۇراسىن زەرتتەۋدى جۇيەلى تۇردە قولعا الدى
الماتى. KAZINFORM — الماتىداعى ءابۋ ناسىر ءال-ءفارابيدىڭ فيلوسوفيالىق جانە عىلىمي مۇراسىنا ارنالعان «فيلوسوفيا. ەتيكا. بولاشاق» اتتى حالىقارالىق سيمپوزيۋمعا قاتىسقان ۆيتسە-پرەزيدەنت ەرلان قارين اۋقىمدى ءارى ماڭىزدى عىلىمي ءىس-شارا ەكى جىلدا ءبىر رەت تۇراقتى تۇردە ۇيىمداستىرىلاتىنىن جەتكىزدى.
— پرەزيدەنت تۇركىستاندا - ياساۋي، الماتىدا ءال-فارابي مۇراسىنا ارنالعان حالىقارالىق سيمپوزيۋمداردى بۇدان بىلاي تۇراقتى تۇردە ۇيىمداستىرۋدى تاپسىردى. سوندىقتان، ەكى ۇلكەن تۇلعاعا ارنالعان مۇنداي جيىندار كەزەكپەنەن ەكى جىلدا ءبىر رەت وتكىزىلەدى. بۇل — رۋحاني مۇرامىزدى ناۋقاندىق ەمەس، ينستيتۋتسيونالدىق دەڭگەيدە جۇيەلى ءارى كەشەندى زەرتتەۋگە كوشكەنىمىزدى كورسەتەدى. قازاقستان ءوزىنىڭ تاريحىن، رۋحاني مۇراسىن زەرتتەۋدى، ناسيحاتتاۋدى جۇيەلى تۇردە قولعا الىپ جاتىر. بۇل — اعارتۋشىلىق باعىتتاعى ۇلكەن بەتبۇرىستىڭ بەلگىسى، — دەدى ەرلان قارين.
ۆيتسە- پرەزيدەنت حالىقارالىق سيمپوزيۋمنىڭ اشىلۋىندا مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ بەردى.
پرەزيدەنت جيىنعا قاتىسۋشىلارعا جولداعان حاتىندا ۇلى ويشىلداردىڭ وزىق يدەيالارىن تەرەڭ زەردەلەپ، وسكەلەڭ ۇرپاق اراسىندا كەڭىنەن ناسيحاتتاۋدىڭ، سونداي-اق ونىڭ ءبارىن زاماناۋي عىلىم تۇرعىسىنان پايىمداۋدىڭ ماڭىزدى ەكەنىنە نازار اۋدارعان.
ەسكە سالايىق، بۇعان دەيىن ەرلان قارين مەرەكە قۇلكەنوۆپەن قازاق ادەبيەتىنىڭ دامۋىن تالقىلاعان ەدى.
