ەرلان قارين بيىل اباي اتىنداعى مەملەكەتتىك سىيلىق نە ءۇشىن بەرىلمەيتىنىن ءتۇسىندىردى

ەرلان قارين مەملەكەتتىك سىيلىق تۇلعاعا ەمەس، تۋىندىعا بەرىلەتىن سىيلىق ەكەنىن اتاپ ءوتتى. ايتۋىنشا، بيىل داۋىس بەرۋ قورىتىندىسىنا سايكەس بىردە-ءبىر جۇمىس كوميسسيا مۇشەلەرىنىڭ باسىم داۋسىنا يە بولا الماعان.

— بىرىنشىدەن، كونكۋرسقا تۇسكەن ۇمىتكەرلەردىڭ بارلىعىن سىيلايمىز، قۇرمەتتەيمىز. ولار ءتول رۋحانياتتىڭ دامۋىنا ۇلكەن ۇلەس قوسىپ كەلە جاتقان بەلگىلى تۇلعالار. ءوزىم دە ءبىرقاتارىن جەكە تانيمىن. ءبىراق مەملەكەتتىك سىيلىق - تۇلعاعا ەمەس، تۋىندىعا بەرىلەتىن سىيلىق. وسىنىڭ اراجىگىن اجىراتىپ العان دۇرىس. اتاقتى بىرەۋگە ۇناۋ نەمەسە جاعۋ ءۇشىن، رەنجىپ قالماسىن دەگەن سەبەپپەن بەرەتىن بولساق، ونەر ودان دامىمايدى، بۇل اتاقتىڭ مارتەبەسى ارتپايدى. ەكىنشىدەن، ءبارىمىز تارتىپكە باعىنۋىمىز قاجەت. ۇسىنىلعان تۋىندىلاردىڭ بارلىعى داۋىسقا سالىندى. ءبىراق داۋىس بەرۋ قورىتىندىسى بويىنشا بىردە- ءبىر جۇمىس كوميسسيا مۇشەلەرىنىڭ ايقىن باسىم داۋىسىنا يە بولا العان جوق. كەرىسىنشە، جۇمىستاردى قولداماعاندار مەن قالىس قالعانداردىڭ ۇلەسى باسىم بولدى، - دەدى ۆيسە-پرەزيدەنت.

ەرلان قارين بۇعان دەيىن دە لايىقتى جۇمىستاردىڭ بولماۋىنا بايلانىستى مەملەكەتتىك سىيلىق بەرىلمەگەن جاعداي بولعانىن اتاپ ءوتتى. سونىمەن بىرگە مەملەكەتتىك سىيلىق ءتارتىبى مەن ەرەجەسىنە وزگەرىس ەنگىزىلەتىنىن ايتتى.

— مىسالى، 2023 -جىلى گۋمانيتارلىق عىلىمدار سالاسىنداعى ا. بايتۇرسىن ۇلى اتىنداعى مەملەكەتتىك سىيلىق لايىقتى جۇمىستاردىڭ جوقتىعىنا بايلانىستى بەرىلگەن جوق. سوندىقتان كونكۋرس بولعاسىن ونىڭ ناتيجەسىندە ءارتۇرلى بولۋى مۇمكىن، ونى دۇرىس قابىلداۋ كەرەك. ۇشىنشىدەن، وتىرىستىڭ سوڭىندا اباي اتىنداعى مەملەكەتتىك سىيلىققا تۇتاستاي رەفورما كەرەك ەكەنى ايتىلدى. بۇل پىكىردى كەشەلى بەرى جەلى قولدانۋشىلارى دا قولداپ جازىپ جاتىر. شىنىندا دا، مەملەكەتتىك سىيلىقتى بەرۋ ءتارتىبى قازىرگى كەزەڭنىڭ تالاپتارىنا سايكەس كەلمەيدى. سىيلىقتىڭ تالاپ، ءتارتىبى عانا ەمەس، مازمۇنى مەن سيپاتى دا وزگەرۋى كەرەك. مىسالى، الەمدەگى ەڭ بەدەلدى نوبەل سىيلىعى 50 نە 70 جاسقا تولعانى ءۇشىن ەمەس، جاڭالىق پەن جاڭاشىلدىق ءۇشىن بەرىلەدى. سول سياقتى اباي اتىنداعى مەملەكەتتىك سىيلىقتى مەرەيتوي يەسىنە، ۇمىتكەردىڭ ماتەريالدىق جاعدايىنا جانە باسقاداي سەبەپتەرگە بايلانىستى ۇسىنۋ جالپى دۇرىس ەمەس. سوندىقتان مەملەكەتتىك سىيلىق ءتارتىبى مەن ەرەجەسىنە ۇلكەن وزگەرىس ەنگىزەمىز. 2000 -جىلداردان بەرى قاراي ەسەپتەسەك، اباي اتىنداعى مەملەكەتتىك سىيلىق 60-قا جۋىق ادامعا بەرىلگەن ەكەن. دەمەك، شىعارماشىلىق سالانىڭ وسىنشاما وكىلىنە مەملەكەت تاراپىنان ۇلكەن قولداۋ كورسەتىلدى دەگەن ءسوز. ونىڭ ۇستىنە پرەزيدەنت قاسىم-جومارت توقايەۆتىڭ شەشىمىمەن مەملەكەتتىك سىيلىق يەگەرلەرىنە بەرىلەتىن قاراجات ارتتى. دەمەك، بەدەلدى سىيلىققا ۇسىنىلاتىن تۋىندىلار دا وسىعان لايىق بولۋى شارت، - دەدى ەرلان قارين.

بيىل اباي اتىنداعى مەملەكەتتىك سىيلىق بەرىلمەيتىن بۇعان دەيىن جازعان بولاتىنبىز.