ەرلان قارين ايگىلى اكتەر دجەكي چانمەن كەزدەستى

مەملەكەت باسشىسىنىڭ تاپسىرماسى بويىنشا ۆيتسە-پرەزيدەنت حالىقارالىق كينوجوبانىڭ ءتۇسىرىلىم توبى مۇشەلەرىمەن كەزدەستى.

كەزدەسۋگە الەمگە ايگىلى رەجيسسەر، اكتەر دجەكي چان، سونداي-اق، شەتەلدىك جانە قازاقستاندىق پروديۋسەرلەر ەسموند رەن، رۇستەم وماروۆ، يگور ساي جانە ورىنباسار قۇدايبەرگەنوۆ قاتىستى.

كەزدەسۋ بارىسىندا كينەماتوگرافيا سالاسىنداعى حالىقارالىق ىنتىماقتاستىقتى دامىتۋ ماسەلەلەرى، سونداي-اق، بىرلەسكەن جوبالاردى ودان ءارى جۇزەگە اسىرۋ مۇمكىندىكتەرى تالقىلانعان.

كەزدەسۋ سوڭىندا ەرلان قارين دجەكي چانعا قازاقستانعا دەگەن ايرىقشا ىقىلاسى ءۇشىن العىس ايتىپ، جوباعا قاتىسۋشىلاردىڭ الداعى شىعارماشىلىق جۇمىسىنا تابىس تىلەدى.

ايتا كەتەيىك، تانىمال اكتەر دجەكي چان تۇسەتىن Armour of God: Ultimatum اتتى حالىقارالىق فيلمنىڭ ءتۇسىرىلىمى بيىل شىلدە مەن قازان ارالىعىندا قازاقستان اۋماعىندا ءوتتى. كارتينانىڭ قويۋشى رەجيسسەرى - روبەرت كۋن. نەگىزگى ءتۇسىرىلىم الاڭدارى الماتى قالاسىندا، الماتى جانە ماڭعىستاۋ وبلىستارىندا ورنالاسقان.

ەسكە سالايىق، بۇعان دەيىن دجەكي چان الماتىدا جاستارمەن كەزدەسكەنى حابارلاندى.