تۇركىستان وبلىسىندا شەگەمەن سۋرەت سالاتىن ۇستاز تۇرادى
تۇركىستان. KAZINFORM - ورداباسى اۋدانىندا ءجىپ پەن شەگە ارقىلى ساندىك كەسكىندەمەلەر جاسايتىن ەرەكشە ۇستاز تۇرادى.
ايرىقشا ونەرىمەن كوپشىلىكتى ءتانتتى ەتىپ جۇرگەن اينۇر ساپار قىزى شۇبارسۋ اۋىلىنداعى بالتاباي نۇرلىبەكوۆ اتىنداعى جالپى ءبىلىم بەرەتىن مەكتەپتە كوركەم ەڭبەك پانىنەن ساباق بەرەدى.
ونەرلى ۇستازعا كەرەگى كادۋەلگى كىشكەنتاي شەگە مەن ءجىپ. العاشقى كەزەكتە جيھاز جاسايتىن اعاشقا قارانداشپەن سۋرەت سالىپ الادى دا، ونىڭ ۇستىنە شەگە قاعادى. كەيىن قاتتى قارا ءتۇستى جىپپەن شەگەلەردى بايلاپ، بايلانىستىرادى. ناتيجەسىندە كەرەمەت كەسكىندەمە شىعادى.
اينۇر ساپار قىزىنىڭ بۇل ونەردى قولعا العانىنا كوپ بولا قويماعان. تىڭ جوبا تۋرالى ينتەرنەتتەن كورگەن. سودان كوپ ىزدەنگەن. العاشقىدا قاراپايىم زاتتاردى جاساپ كورگەن. ءساتتى شىققان جوبالارى كوپشىلىكتىڭ قىزىعۋشىلىعىن تۋدىرعان.
«بۇل «String art» تەحنولوگياسى دەپ اتالادى. ياعني، شەگەلەر مەن جىپتەرگە نەگىزدەلگەن قولمەن جاسالاتىن ونەر. بۇل ونەر تۋىندىسىنىڭ تامىرى XVII عاسىردا انگليادان باستالعان دەسەدى. قازىر ءوزىم بالا كۇتىمىمەن ۇيدە وتىرمىن. كۇندەلىكتى ۋاقىتىمدى بوسقا وتكىزبەس ءۇشىن، الىدە اتالعان جوبا بويىنشا ىزدەنىپ كەلەمىن. جۇمىسقا ەڭ كىشكەنتاي شەگەنى پايدالانامىن. ال وراۋعا اياق كيىم تىگەتىن قاتتى ءجىپتى قولدانامىن جانە جيھاز جاسايتىن اعاش قاجەت. بولدى. قالعانى قول ەڭبەگىمەن قۇراستىرىلادى»، - دەيدى اينۇر ساپار قىزى.
ونەرلى ۇستاز قازاقتىڭ ءبىرتۋار زيالىلارى اباي قۇنانباي ۇلىنىڭ، ىبىراي التىنسارين مەن احمەت بايتۇرسىنوۆتىڭ بەينەسىن شەگە مەن ءجىپ ارقىلى سالىپ شىقتى. شەبەر بۇل جۇمىستارعا ءبىر ايعا جۋىق ۋاقىت جۇمساعان.
تانىمال تۇلعالاردىڭ كەسكىن كەلبەتتەرىن اينا-قاتەسىز كەلتىرگەن. تىڭ جوباعا قاتتى قىزىعۋشىلىق ارتقاندىقتان مەكتەپ باسشىلىعىمەن اقىلداسا وتىرىپ، سۋرەتتەردى مەكتەپ مۇراجايىنا قويىپتى. بۇگىندە كەز كەلگەن ادام كورىپ، تاماشالاي الادى. الداعى ۋاقىتتا اينۇر اتالعان ونەر ءتۇرىن وسكەلەڭ ۇرپاقتىڭ بوس ۋاقىتىن ءتيىمدى پايدالانۋ ءۇشىن جانە ونەرگە قىزىعۋشىلىعىن ارتتىرۋ ماقساتىندا ءبىلىم الۋشىلارعا دا ۇيرەتۋدى جوسپارلاپ وتىر.
«مەنىڭ جاس كەزىمنەن حوببيىم سۋرەت سالۋ بولدى. جوعارى وقۋ ورنىنا بارعاندا دا بەينەلەۋ ونەرىن تاڭداعان بولاتىنمىن. ءبىراق اتا-انامنىڭ ايتۋىمەن ەڭبەك ءپانى مۇعالىمى بولدىم. دەگەنمەن سۋرەت سالۋدى تاستاعان ەمەسپىن. قازىر قىزدارىمنىڭدا سۋرەت سالۋعا قابىلەتى بار. جاقسى سالادى. ودان بولەك قولونەرمەن اينالىسامىن. ماتادان بالالاردىڭ ويىن دامىتاتىن ويىنشىقتار جاسايمىن»، - دەيدى شەبەر ۇستاز.
اۆتور
قايرات زاينيشيەۆ
