گرەكياداعى ورمان ءورتى: ياحتا ەكيپاجى قاماۋعا الىندى

استانا. KAZINFORM - گرەكيانىڭ گيدرا ارالىنداعى ورمان ورتىنەن كەيىن 13 ادام قاماۋعا الىندى، بيلىك ءورتتىڭ شىعۋىنا «پەرسەفوني» ياحتاسىنان ۇشىرىلعان وتشاشۋ سەبەپ بولدى دەپ وتىر، دەپ حابارلايدى BBC.

گرەكيانىڭ كليماتتىق داعدارىس جونىندەگى ءمينيسترى ۆاسيليس كيكيلياستىڭ حابارلاۋىنشا، جۇما كۇنى شىققان ءورت افينانىڭ وڭتۇستىگىندەگى ايگىلى تۋريستىك ارالداعى جالعىز قاراعايلى ورماننىڭ 300 شارشى مەترىن شارپىعان.

جالىن اۋىزدىقتالدى، الايدا بۇل وڭايعا سوققان جوق. جاعاجايعا باراتىن جول جوق بولعاندىقتان، ءورت سوندىرۋشىلەر وعان تەڭىز ارقىلى جەتۋگە ءماجبۇر بولدى، ال تىكۇشاقتار سۋدى اۋەدەن ءتۇسىردى.

گرەك اقپارات قۇرالدارى قاماۋعا الىنعانداردىڭ بارلىعى «پەرسەفوني» سۋپەرياحتاسىنىڭ ەكيپاج مۇشەلەرى ەكەنىن حابارلادى. سالتاناتتى ياحتالاردىڭ بىرنەشە ديلەرىنىڭ مالىمەتىنشە، كەمە جالداۋ 249 مىڭ ەۋرودان باستالادى.

ۆ. كيكيلياستىڭ ايتۋىنشا، مەملەكەتتىك ايىپتاۋشى كەمەنى تاركىلەۋدى تالاپ ەتكەن.

بىرنەشە جەرگىلىكتى باق سوت قۇجاتتارىنا سىلتەمە جاساپ، ياحتادا گرەكيادان كەتىپ قالعان 17 قازاقستاندىق ازامات بولعانىن حابارلادى. الايدا، BBC مۇنى تەكسەرە الماعان.

جەكسەنبى كۇنى تاڭەرتەڭ ەكيپاج بىردەي جۇمىس فورماسىن كيىپ، بەتتەرىن كۇننەن قورعايتىن كوزىلدىرىكپەن، ماسكامەن جانە قالپاقپەن جاۋىپ، پيرەي پروكۋراتۋراسىنا كىرگەن كەزدە بەينەگە ءتۇسىپ قالعان.

جەرگىلىكتى ب ا ق- تىڭ حابارلاۋىنشا، ءورت ءسوندىرۋ قىزمەتىنىڭ ماماندارى جاقىن ماڭداعى كەمە كاپيتانى بەرگەن مالىمەت بويىنشا، «پەرسەفونيدان» بەلگى بەرۋ راكەتاسى نەمەسە وتشاشۋ ۇشقانىن حابارلاعان. الايدا، جاعالاۋ كۇزەتى بۇل اقپاراتتى راستايتىن ەشقانداي دالەل جوق ەكەنىن العا تارتىپ وتىر.

ورتكە سەبەپ بولۋى مۇمكىن دەگەن بولجامدى ەستىگەندە بىرنەشە ورمان ورتىمەن كۇرەسىپ جاتقان گرەكيادا نارازىلىق تۋىندادى. بۇدان بولەك جىلدىڭ العاشقى ىستىق تولقىنىن باستان كەشىرىپ جاتقاندىقتان ولارعا وڭاي تيمەدى.

«كەيبىر ادامداردىڭ قاراعايلى ورمانعا وتشاشۋدى سونشالىقتى جاۋاپسىز لاقتىرعانىنا اشۋلانامىز»، - دەدى يدرا مەرى يورگوس كۋكۋداكيس سەنبى كۇنى گرەكيانىڭ ERT تەلەارناسىنا.

گرەكيا سەيسەنبىدەن بەرى ورمان ورتتەرىنە قىزۋ دايىندىقتا وتىر. بيلىك اپتاپ ىستىق پەن قۇرعاق كۇن رايىنا، قاتتى جەل مەن جوعارى تەمپەراتۋرا ساقتالىپ وتىرعان جاز ماۋسىمىنا دايىندىقتى بارىنشا ۇدەتتى.

اۆتور

زارينا تۋعانبايەۆا