رۋدنىيداعى مۇز قالاشىعى ەري باستادى

استانا. KAZINFORM - رۋدنىي قالاسىنىڭ اكىمدىگى قۇرىلىستىڭ قۇلاۋ قاۋپىنە بايلانىستى «مۇز قالاشىعىن» ۋاقىتشا جاۋىپ تاستادى، دەپ حابارلايدى Kazinform ءتىلشىسى.

3 -قاڭتاردا قوستاناي وبلىسىندا اۋا رايى كوكتەمنىڭ كۇنىندەي جىلي باستادى. كۇندىزگى ۋاقىتتا تەرمومەتر نولدەن جوعارى دەڭگەيگە جەتىپ، كەيبىر ەلدى مەكەندەردە قار مەن مۇز ەري باستادى.

قاۋىپسىزدىكتى ساقتاۋ شارالارى اياسىندا جەرگىلىكتى بيلىك رۋدنىيداعى مۇز قالاشىعىن جابۋ تۋرالى شەشىم قابىلداعان.

- اۋا رايىنىڭ قۇبىلۋىنا جانە اۋا تەمپەراتۋراسىنىڭ كوتەرىلۋىنە بايلانىستى قاۋىپسىزدىكتى قامتاماسىز ەتۋ ماقساتىندا تسۋم اۋماعىنداعى مۇز قالاشىعى ۋاقىتشا جابىلدى. قالاشىقتى قالپىنا كەلتىرۋگە قاتىستى قوسىمشا اقپارات بەرىلەدى، - دەلىنگەن حابارلامادا.

وبلىس ورتالىعىنداعى شەكتەۋلەرگە كەلسەك، قوستانايلىقتار دا مۇز قالاشىقتارىنا بارا الماي وتىر.

- بەلگىلەنگەن نولدەن جوعارى تەمپەراتۋراعا بايلانىستى جانە قاۋىپسىزدىكتى قامتاماسىز ەتۋ ماقساتىندا توتەنشە جاعدايلار ورگاندارىمەن بىرلەسىپ، 4 -قاڭتاردان باستاپ سىرعاناقتاردىڭ (ورتالىق الاڭ، جاستار بۋلۆارى، جاستار سارايى) جۇمىسىن ۋاقىتشا توقتاتۋ تۋرالى شەشىم قابىلداندى. اۋا-رايى قولايلى بولىپ، تۇراقتى نولدىك تەمپەراتۋرا ورناعان بويدا سىرعاناق ورىندارى تاعى دا حالىق ءۇشىن اشىق بولادى، - دەپ حابارلادى اكىمدىك.

جاراسقان نۇرىبايەۆ

اۆتور