گەرمانيادا ەلەكتروموبيل نارىعىن قىتايلىق وندىرۋشىلەر جاۋلاپ بارادى
استانا. قازاقپارات - 2026 -جىلعى قازاندا گەرمانيادا 94 مىڭعا جۋىق جاڭا ەلەكتروموبيل تىركەلدى. بۇل بىلتىرعى وسى كەزەڭىمەن سالىستىرعاندا شامامەن %80- عا كوپ، دەپ حابارلايدى Kazinform DW- گە سىلتەمە جاساپ.
گەرمانيانىڭ فەدەرالدىق كولىك باسقارماسىنىڭ مالىمەتىنشە، 2026 -جىلعى قازاندا ەلدە 254,5 مىڭعا جۋىق جاڭا جەڭىل اۆتوكولىك تىركەلگەن. ونىڭ 94 مىڭعا جۋىعى - تولىقتاي ەلەكتر قۋاتىمەن جۇرەتىن كولىك.
ال ىشتەن جانۋ قوزعالتقىشى بار اۆتوكولىكتەرگە سۇرانىس تومەندەگەن. قازاندا مۇنداي كولىكتەردىڭ تىركەلگەن سانى شامامەن 62,4 مىڭ بولعان.
ەلەكتروموبيلدەردىڭ تانىمال بولۋىنا جانارمايدىڭ قىمباتتاۋى جانە 2026 -جىلعى مامىردا ىسكە قوسىلعان مەملەكەتتىك سۋبسيديا باعدارلاماسى اسەر ەتكەن.
سۇرانىس ارتقانىنا قاراماستان، بۇل ۇردىستەن نەگىزىنەن شەتەلدىك اۆتوكولىك وندىرۋشىلەرى پايدا كورىپ وتىر.
اسىرەسە، قىتاي كومپانيالارىنىڭ كورسەتكىشى جوعارى. EY كونسالتينگتىك كومپانياسىنىڭ دەرەگىنشە، گەرمانيانىڭ ەلەكتروموبيل نارىعىنداعى قىتايلىق وندىرۋشىلەردىڭ ۇلەسى %5,2- دان %8,4- عا دەيىن وسكەن.
ال نەمىس اۆتوكولىك وندىرۋشىلەرى ەلەكتروموبيل نارىعىنداعى ۇلەسىنەن ايىرىلىپ جاتىر.
ەسكە سالايىق، بۇعان دەيىن بەرلين مەن پاريج ەۋروپانىڭ جاڭا كولىكتەرگە قوياتىن كليماتتىق تالاپتارىن قايتا قاراۋ بويىنشا بىرلەسكەن جوسپار جونىندە كەلىسىمگە كەلگەنىن حابارلاعانبىز. وعان سايكەس، اۆتووندىرۋشىلەر جاڭا كولىكتەرىنىڭ ورتاشا CO₂ شىعارىندىسىن 2021 -جىلعى دەڭگەيمەن سالىستىرعاندا %90- عا تومەندەتسە جەتكىلىكتى، ال قازىرگى ەو ەرەجەلەرى %100- عا تومەندەتۋدى تالاپ ەتەدى.
