گەرمانيا بالالاردىڭ زەينەتاقى شوتىنا اي سايىن 10 ەۋرودان اۋدارماق
استانا. KAZINFORM — گەرمانيا بۋندەستاگى بالالارعا ارنالعان زەينەتاقى جيناقتارى تۋرالى زاڭدى ماقۇلدادى، وعان سايكەس جەكە ينۆەستيتسيالىق شوتتارعا اي سايىن 10 ەۋرو كولەمىندە مەملەكەتتىك تولەمدەر اۋدارىلادى، دەپ حابارلايدى Deutsche Welle.
«زەينەتتى ەرتە باستاۋ» زاڭى (Frühstartrente) 16 -قازاندا بيلەۋشى كواليتسيا مۇشەلەرىنىڭ كوپشىلىگىنىڭ قولداۋىنا يە بولدى. باعدارلاما ەرتە جاستان زەينەتاقى جيناۋعا جانە بالالاردىڭ قارجىلىق ساۋاتتىلىعىن ارتتىرۋعا باعىتتالعان.
جاڭا ەرەجەلەرگە سايكەس، مەملەكەت 6 جاستان 18 جاسقا دەيىنگى بالالاردىڭ جيناق شوتتارىنا اي سايىن 10 ەۋرو اۋدارادى. ال اتا-انالارى مەن اتا اجەلەرى جىلىنا قوسىمشا 6840 ەۋروعا دەيىن سالۋىنا بولادى.
اتا-انالار ينۆەستيتسيالىق شوت اشۋ ءۇشىن جەكە مەكەمەنى تاڭداي الادى. ەگەر ينۆەستيتسيالىق شوت اشپاسا، مەملەكەت قاراجاتتى Deutsche Bundesbank باسقاراتىن ارنايى فەدەرالدى قورعا اۋدارىپ وتىرادى. 18 جاسقا تولعاننان كەيىن قاتىسۋشىلار ءوز جيناقتارىن ءوز بەتىنشە تولتىرا الادى جانە 25 جاسقا دەيىن قاراجاتتى جەكە زەينەتاقى جوسپارىنا اۋدارا الادى.
گەرمانيانىڭ قارجى ءمينيسترى لارس كلينگبايل باعدارلاما بالالارعا بولاشاق زەينەتاقىعا شىعۋ ءۇشىن باستاپقى كاپيتال بەرەتىنىن جانە ولارعا جەكە قارجىلارىن باسقارۋدى ۇيرەتەتىنىن اتاپ ءوتتى.
دەگەنمەن، بۇل باستاما وپپوزيتسيا تاراپىنان سىنعا ۇشىرادى. جاسىلدار مەن سولشىل پارتيا وكىلدەرى باعدارلاما الەۋمەتتىك تەڭسىزدىكتى كۇشەيتۋى مۇمكىن دەپ سانايدى، سەبەبى باي وتباسىلار قوسىمشا جارنالار سالا الادى، ال از قامتىلعان وتباسىلاردىڭ بالالارى تەك مەملەكەتتىك قولداۋمەن شەكتەلەدى.
سولشىل پارتيا دەپۋتاتى يزابەل ۆاندرەنىڭ ەسەپتەۋلەرىنە سايكەس، 12 جىل بويى تەك مەملەكەتتىك جاردەماقى الاتىن بالانىڭ شوتىنا، ينۆەستيتسيالىق كىرىستى قوسپاعاندا، 1440 ەۋرو عانا تۇسەدى. ال اتا-انالارى قوسىمشا جارنا سالىپ وتىراتىن بالالدىڭ شوتىنداعى سوما 83520 ەۋروعا جەتۋى مۇمكىن.
باعدارلاما 2026 -جىلدىڭ 1 -قاڭتارىنان باستالۋى قاجەت، ياعني وتكەن ايلارعا دا اۋلارىلادى، سوندا 2020 -جىلى تۋىلعان بالالار تۇگەل قامتىلادى. 2027 -جىلدان باستاپ زاڭعا جىل سايىن التى جاسار بالالاردىڭ جاڭا جاس توپتارى قوسىلىپ وتىرادى.
زاڭنىڭ كۇشىنە ەنۋى ءۇشىن ونى گەرمانيانىڭ فەدەرالدى جەرلەرىنىڭ وكىلدەرى سانالاتىن پالاتا بۋندەسرات ماقۇلداۋى قاجەت.
