فرانسيانىڭ ەكس-پرەمەرىنە وردەن تاعۋعا تىيىم سالىندى

 سوت ۇكىمى زاڭدى كۇشىنە ەنگەننەن كەيىن فيون وردەننىڭ ۇلى وفيسەرى مارتەبەسىنە بايلانىستى قۇقىقتارىنان 10 جىلعا ايىرىلدى. وسى كەزەڭدە ول فرانسيانىڭ جانە شەتەل مەملەكەتتەرىنىڭ ۇلى كانسەلياريا قاراماعىنداعى وردەندەرىن تاعا المايدى. سونداي-اق ناگراداعا بايلانىستى حاتتامالىق ارتىقشىلىقتار مەن سالتاناتتى قۇرمەتتەردەن ۋاقىتشا ايىرىلادى.

بۇدان بولەك، تاعى ءبىر جارلىقپەن ەكس-ساياساتكەرگە ۇلتتىق «ەرەن ەڭبەگى ءۇشىن» وردەنىنە بايلانىستى قۇقىقتاردى پايدالانۋعا 10 جىلعا تىيىم سالىندى. فرانسۋا فيون بۇل وردەننىڭ ەڭ جوعارى دارەجەسى - ۇلكەن كرەست يەگەرى. ۇلى وفيسەر - قۇرمەت لەگيونى وردەنىندەگى ۇلكەن كرەستتەن كەيىنگى ەكىنشى جوعارى مارتەبە. زاڭعا سايكەس، فرانسيانىڭ كەمىندە ەكى جىل پرەمەر-ءمينيسترى بولعان ازاماتتارعا بۇل دارەجە اۆتوماتتى تۇردە بەرىلەدى. فيون 2007-2012 -جىلدارى فرانسيا ۇكىمەتىن باسقاردى.

ايتا كەتەيىك، ساياساتكەردىڭ وردەندەرى رەسمي تۇردە تاركىلەنگەن جوق. شەكتەۋ مەرزىمى اياقتالعاننان كەيىن ول ناگرادالارىن قايتا پايدالانا الادى. سوندىقتان بۇل شەشىمنىڭ نەگىزىنەن سيمۆولدىق ءمانى بار. 2025 -جىلعى ماۋسىمدا پاريج اپەللياتسيالىق سوتى فرانسۋا فيوندى ءتورت جىلعا شارتتى تۇردە باس بوستاندىعىنان ايىرۋعا، 375 مىڭ ەۋرو كولەمىندە ايىپپۇل تولەۋگە جانە بەس جىل بويى سايلاۋعا ءتۇسۋ قۇقىعىنان ايىرۋعا ۇكىم شىعارعان.

2026 -جىلعى اقپاندا ساياساتكەر كاسساتسيالىق شاعىمىن قايتارىپ العاننان كەيىن سوت ۇكىمى زاڭدى كۇشىنە ەندى. سوت ساياساتكەردىڭ ايەلى پەنەلوپا فيوننىڭ دەپۋتات كومەكشىسى رەتىندە جالاقى العانىمەن، بۇل جۇمىستى ءىس جۇزىندە اتقارماعانىن انىقتاعان. بۇل جانجال 2017 -جىلعى پرەزيدەنتتىك سايلاۋ ناۋقانى كەزىندە ءورشىپ، فيوننىڭ سايلاۋدىڭ ءبىرىنشى كەزەڭىندە جەڭىلۋىنە سەبەپ بولعان.

 24.kz