فرانسياداعى جاپپاي تارتىپسىزدىكتەر كەزىندە 2 مىڭنان استام ادام ۇستالدى
استانا. KAZINFORM - فرانسيادا جاپپاي نارازىلىق شارالارى تارتىپسىزدىكتەرگە ۇلاسىپ، 2 مىڭنان استام ادام ۇستالدى. قاقتىعىستار كەزىندە پوليتسيا مەن ءورت ءسوندىرۋ قىزمەتىنىڭ 600-دەن استام قىزمەتكەرى زارداپ شەككەن. وسى جاعدايعا بايلانىستى فرانسيا پرەزيدەنتى ەممانۋەل ماكرون حالىققا ۇندەۋ جاساماقشى. بۇل تۋرالى DW اگەنتتىگى جازدى.
ۇستالعاندار سانى تۋرالى ەلدىڭ ىشكى ىستەر ءمينيسترى لوران نۋنەس مالىمدەدى. ونىڭ ايتۋىنشا، ازىرگە جاريالانعان دەرەكتەر الدىن الا الىنعان. مينيستر تارتىپسىزدىك پەن زورلىق-زومبىلىققا قاتىسقانداردىڭ بارلىعى جاۋاپقا تارتىلاتىنىن ايتتى.
نارازىلىق اكسيالارى پاريج، مارسەل، ليون، بوردو، رەنن، ستراسبۋرگ، گرەنوبل، نيتستسا جانە ليموج قالالارىندا ءوتتى. ۇيىمداستىرۋشىلاردىڭ مالىمەتىنشە، شەرۋلەرگە 800 مىڭنان استام ادام قاتىسقان. نارازىلار ءومىر ءسۇرۋ قۇنىنىڭ، جانارماي باعاسىنىڭ وسۋىنە جانە مەملەكەتتىك قىزمەتتەردىڭ جۇمىسىنا قاتىستى ماسەلەلەرگە نازار اۋدارۋدى تالاپ ەتتى.
الايدا نارازىلىقتار تارتىپسىزدىككە ۇلاستى. مارسەلدە اكسياعا قاتىسۋشىلار مەريا عيماراتىنا كىرسە، بوردودا جۇزگە جۋىق دۇكەن تونالدى. ال ليموج قالاسىندا شىققان ءورت سالدارىنان XIX عاسىردا سالىنعان تاريحي مەريا عيماراتىنا ايتارلىقتاي زاقىم كەلدى.
