پەرۋ پرەزيدەنتى پارا الدى دەپ ايىپتالىپ جاتىر
ليما. KAZINFORM - پەرۋ باس پروكۋراتۋراسى ەل پرەزيدەنتى دينا بولۋارتەنى پارا الدى دەپ ايىپتاپ، ونىڭ ۇستىنەن كونگرەسسكە كونستيتۋتسيالىق شاعىم جولدادى. بۇل تۋرالى Reuters اگەنتتىگى حابارلادى.
ەگەر كونگرەسس شاعىمدى قابىلداسا، جاعداي پرەزيدەنتتىڭ وتستاۆكاعا كەتۋىنە اكەلۋى مۇمكىن ەكەنى اتاپ ءوتىلدى. بولۋارتەگە قارسى تەرگەۋ 10 مىڭعا جۋىق فوتوسۋرەتتى تالداۋ ناتيجەسىندە پرەزيدەنتتىڭ 14 قىمبات ساعاتى بار ەكەنى انىقتالعان كەزدە باستالدى.
پرەزيدەنت سونداي-اق بولات پەن قىزعىلت التىننان جاسالعان Rolex ساعاتىن تاققان، ونىڭ قۇنى 6000 دوللاردان 14000 دوللارعا دەيىن جەتەدى. پەرۋ پرەزيدەنتىنىڭ جالاقىسى شامامەن 11 مىڭ دوللار. پرەزيدەنت Rolex ساعاتىنىڭ بار ەكەنىن جوققا شىعارمادى جانە ونى تاعۋ ءۇشىن باسقا شەنەۋنىكتەن العانىن ايتتى.
ناۋرىز ايىنىڭ سوڭىندا پرەزيدەنت رەزيدەنسياسىندا ءتىنتۋ جۇرگىزگەننەن كەيىن كونگرەسستىڭ 25 مۇشەسىنەن تۇراتىن توپ بۋلارتەگە يمپيچمەنت جاريالاۋ تۋرالى تەرگەۋدى باستادى. ول پرەزيدەنت رەزيدەنسياسىن ءتىنتۋدى «پروپورتسيونالدى ەمەس جانە قورلاۋ شاراسى» دەپ اتاپ، وتستاۆكاعا كەتۋدەن باس تارتتى.
«مەن قىزمەتكە تازا قولمەن كەلدىم، 2026 -جىلى پرەزيدەنتتىكتەن كەتەمىن»، - دەدى ول.
ءتىنتۋدى پەرۋ پرەمەر-ءمينيسترى گۋستاۆو ادريانسەن دە سىنعا الدى.
اۆتور
جاراسقان نۇرىبايەۆ
