ەر ادامداردىڭ دوستىعى قانداي؟
استانا. قازاقپارات - ەر ادامداردىڭ دوستىعى قىزداردىكىنە قاراعاندا الدەقايدا ەرەكشە. بۇل جاراتىلىستىڭ ەرەكشەلىگىنەن بولار. ولار ءۇشىن ادالدىق، سەنىم، تۇراقتىلىق باستى قاسيەتتەر بولىپ تابىلادى.
1. ۇستامدىلىق
قىزدار قاۋىمى قۇربىسىنا ىشىندەگىسىن جايىپ سالىپ، بارىمەن بولىسكەندى ۇناتادى. ال ەر ادامدار كەرىسىنشە مۇندايدا ۇستامدىراق بولعاندى قالايدى. ولار دوسىنا شىندىقتى ايتىپ وتىرعان كەزدىڭ وزىندە قورقىنىشى مەن قۋانىشىن جاسىرىپ وتىرادى. ولارعا كەيبىر دۇنيەلەردى ءبىر-بىرىنەن جاسىرۋ ىڭعايلى.
«جىگىتتەردى بالا كۇنىنەن باستاپ سەن قامقورشىسىڭ، سەن باتىلسىڭ، باتىرسىڭ، مىقتىسىڭ دەپ تاربيەلەيمىز. مۇنىڭ پايداسىمەن قوسا، زيانى دا بار. ول وسە كەلە ەموسيالىق سەزىمدەرىن ىشتەرىندە جاسىرىپ قالۋعا بەيىمدەلەدى»، - دەيدى الەۋمەتتانۋشى يگور كون. ولار ءمان-جايدى تۇسىندىرگەندە دە، قىسقالىققا بوي الدىرادى. پسيحولوگتاردىڭ ايتۋىنشا، بۇل كوپ جاعدايدا جاساندىلىق بولىپ تابىلادى.
2. باسەكەلەستىك
ەر ادامداردىڭ بويىندا باقتالاستىق مىندەتتى تۇردە بولادى، ولار اركىمدە ءارتۇرلى جاعدايدا كورىنەدى. ءبىر قىزىعى، ولاردىڭ باقتالاستىقتارى ءبىر-بىرىنەن الىستاتىپ قانا قويماي، كەي جاعدايدا دوستىقتارىن نىعايتا تۇسەدى. ەر ادامدار كوپتەگەن جەتىستىكتەرگە ۇمتىلادى. ولارعا وسى جولدا شابىت سىيلايتىن باقتالاس ادام مىندەتتى تۇردە قاجەت. جانە ولار قىزدار قاۋىمى سەكىلدى مۇنداي جاعدايدا رەنجي بەرمەيدى.
3. ورتاق ءىس
اۋىر جۇكتى جۇمىلا وتىرىپ كوتەرگەندى ۇناتادى. ولار ءۇشىن بارلىعى دا ورتاق. ءۇي تۇرعىزىپ جاتقاندا، اسارعا كەلىپ، بىردەن كومەكتەسە كەتەتىندىكتەرى دە سوندىقتان. اقشا ماسەلەسىنە كەلگەندە دە كوپ ساناسا بەرمەيدى. ءبىرى ءۇشىن اقشاسى بولىپ تۇرسا تولەۋگە ءازىر.
پسيحولوگتار مەن الەۋمەتتانۋشىلاردىڭ انىقتاۋىنشا، دوستارىنىڭ كوپ بولۋىنا جىگىتتەرگە قاراعاندا، قىزدار قاۋىمى قارسى ەمەس. پايىزدىق ەسەپپەن%25 ەر ادامنىڭ جان دوستارى جوق بولسا، وسىنشاما قىزدار قاۋىمىنىڭ% 19 -ىندا جان قۇربى جوق ەكەن. ال 45 جاستان اسقان ەر ادامداردىڭ %32-ىندا جان دوستارى جوق.
مامان گلەب لوزينسكي: «ەر ادامدار ءۇشىن دوستىق ماحاببات سەزىمىندەي قاسيەتتى. جان دوستاردى تابۋ عاشىعىن جولىقتىرۋمەن بىردەي. ولار ءۇشىن ەر ادامدار كوپ بولاتىن ورتالاردا ءجۇرۋ وتە ماڭىزدى. بۇل ۋاقىتتا ەرەكشە كۇش-جىگەرمەن الماسادى. مۇنىمەن قاتار قۋانىش سەزىمىن سىيلايدى»، - دەيدى.
ولار ادالدىق اتتى سەزىمدى قاستەرلەپ، ومىرلىك ۇستانىمدارىنداي كورەدى.
دايىنداعان: قارلىعا بۇيەنباي
baq.kz
