قىزىلوردالىق ونەرتاپقىش ءورتتىڭ الدىن الاتىن اقپاراتتىق جۇيە جاسادى

قىزىلوردا. KAZINFORM - قىزىلوردالىق جاس ونەرتاپقىش جۇلدىزاي مۇڭايتباسوۆا «Zhalyn» ءورتتى الدىن الۋ اقپاراتتىق جۇيەسىن جاساپ شىقتى. بۇل جۇيە ءىرى ورتتەردى بولدىرماۋعا باعىتتالعان.

اقپاراتتىق جۇيە حالىقتىڭ ورمان ءورتى تۋرالى حاباردار بولۋىنا ارنالعان ەكولوگيالىق جوبا رەتىندە باعالانىپ وتىر. ماقساتى - ەلىمىزدەگى ورمان ورتتەرىنىڭ جويقىن اسەرىن بارىنشا ازايتۋ.

جۇلدىزاي مۇڭايتباسوۆا قىزىلوردا قالاسىنداعى نازاربايەۆ زياتكەرلىك مەكتەبىندە 11-سىنىپتا وقيدى.

«بۇل كەشەندى جۇيە ەڭ الدىمەن سەزگىش قۇرالدار ارقىلى سالا ماماندارىنا ورمان جاعدايى، اۋماعى، قاي ايماقتا بولىپ جاتقانى تۋرالى اقپارات بەرەدى. سودان كەيىن ماماندار سول ايماققا بارىپ ورمان دەڭگەيىن انىقتاي الادى. سونداي- اق، راديو تولقىندار ينتەرنەتكە رەترانسلياتور ارقىلى اينالىپ، جەرگىلىكتى حالىققا اقپاراتتى پلاتفورما جانە سەرۆەر ارقىلى جىبەرەدى. وسىلايشا بارلىق ادام العاشقى ساتىدا ءورتتى انىقتاپ، جۇمىلا جۇمىس جاساۋىنا مۇمكىندىگى بار. ول ەكونوميكالىق، الەۋمەتتىك شىعىندى ازايتادى. ارتىقشىلىعى - بۇل ءورتتى العاشقى ساتىدا انىقتايتىن جۇيە. جۇيە انىقتاۋعا، الدىن الۋعا، جۇمىس جاساۋعا جول اشادى. ناقتى ىسكە اسىرۋ ءۇشىن بىزگە قازىرگى تاڭدا سەرىكتەستىك قاجەت. ۇكىمەت، توتەنشە جاعدايلار مينيسترلىگىنەن قولداۋ جاسالسا دەگەن ۇسىنىم بار. سودان كەيىن جوبانى نارىققا شىعارىپ، ىسكە اسىرۋعا بولادى»، - دەيدى جۇلدىزاي مۇڭايتباسوۆا.

ءورت تۋرالى اقپارات بارىنە اشىق بولادى. اقپارات مينيسترلىك پەن قاراپايىم ادامعا قولجەتىمدى.

وتكەن جىلى جازدا اباي وبلىسىندا ءىرى ءورت بولدى. ءورت اۋماعى ءبىر كۇننىڭ ىشىندە 100 گەكتارعا دەيىن سوزىلدى. سول ۋاقىتتا ءبىز ەلىمىزدە ءالى دە شەشىلمەگەن وسىنداي ماسەلە بار ەكەنىن انىقتادىق. الداعى ۋاقىتتا سەرىكتەستىك جانە جوبامىزعا ينۆەستيتسيا ىزدەيمىز. كەلەشەكتە جوبامىزعا تاعى دا ءبىر جۇيە قوسىلادى. ول ءورتتى عارىشتان باقىلاۋعا جانە ورمانشىنىڭ قاۋىپسىزدىگىن قامتاماسىز ەتۋگە ارنالادى»، - دەدى جاس ونەرپتاپقىش.

ەسكە سالساق، قىزىلوردالىق ۇستاز مۇحتار تالعات ۇلىنىڭ مەكتەپ وقۋشىلارى مەن مۇعالىمدەرگە ارناپ جاساعان ماتەماتيكالىق سايتى كوپشىلىك اراسىندا ۇلكەن سۇرانىسقا يە بولىپ وتىر.

اۆتور

ءادىلجان ۇمبەت