قىزىلوردادا الاياق ەلدەن جيناپ العان 250 ميلليون تەڭگەسىن كازينوعا جۇمساعان
قىزىلوردا. KAZINFORM - قىزىلوردا وبلىسىندا تانىستارىنا جالعان ايتۋ ارقىلى 250 ميلليون تەڭگەنى الداپ الىپ، ونى كازينو ويىندارىنا جۇمساعان ازامات سوتتالدى.

سوتتالۋشى كاسىپكەرلىكپەن اينالىساتىن تانىستارىندا قوماقتى قاراجات بار ەكەنىنە كوز جەتكىزىپ، ولارعا ءتۇرلى تەندەرگە قاتىسۋعا ۇسىنىس بىلدىرەدى.
سول ارقىلى قاراجاتىن ۇستەمەاقىمەن قايتارىپ الۋعا مۇمكىندىك بار ەكەنىن ايتادى. وعان ءوزى كومەكتەسەتىنى تۋرالى جالعان ۋادە بەرىپ، جابىرلەنۋشىلەردىڭ سەنىمىنە كىرگەن.
«وسىلايشا ول جابىرلەنۋشىنىڭ بىرىنەن 47,7، ەكىنشىسىنەن 62,5، ۇشىنشىسىنەن 80,5، تورتىنشىسىنەن 60 ميلليون تەڭگەنى قولحاتپەن الداپ العان. الاياقتىق ارەكەتىمەن جابىرلەنۋشىلەرگە مۇلىكتىك زالال كەلتىرگەن. سوتتالۋشى سوت وتىرىسىندا ءوزىنىڭ كىناسىن ءىشىنارا مويىندادى. تەندەر جاريالاۋعا قۇقىعى بولماعانىن، تەك شارت رەسىمدەۋمەن اينالىسقانىن ايتتى. جابىرلەنۋشىلەردەن العان اقشامەن قارىزىن جاۋىپ، كازينو ويىندارىنا جۇمساعانىن كورسەتتى»، - دەپ ءمالىم ەتتى وبلىستىق سوتتان.
جابىرلەنۋشىلەر شىعىننىڭ قالپىنا كەلمەگەنىن ايتىپ، وعان باس بوستاندىعىنان ايىرۋ تۇرىندەگى جازاسىن تاعايىنداۋدى سۇرادى.
سوتتالۋشى شىن نيەتپەن وكىنەتىنىن جەتكىزدى.
«ول ق ر قىلمىستىق كودەكسىنىڭ 190-بابى 4-بولىگى 2-تارماعىمەن كىنالى دەپ تانىلدى. وعان 6 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. جابىرلەنۋشىلەردىڭ ماتەريالدىق زالال ءوندىرۋ تۋرالى تالاپ قويۋى قاناعاتتاندىرىلدى. ۇكىم زاڭدى كۇشىنە ەندى»، - دەپ تولىقتىردى ۆەدومستۆودان.
اۆتور
ءادىلجان ۇمبەت