قىز بالانى اۋەجايدا قالدىرىپ كەتۋ وقيعاسى: Air Astana سوتتا جەڭىلدى
استانا. قازاقپارات - 12 جاسار قىز بالا - زەرەنى «استانا- ورال» رەيسىنەن ءتۇسىرىپ كەتۋ وقيعاسىنا قاتىستى Air Astana كومپانياسىنىڭ اپپەلياتسيالىق شاعىمى قاناعاتتاندىرىلمادى. بۇل تۋرالى بالانىڭ قورعاۋشىسى دانيلحان شاعاتايەۆ حابارلادى.

- بۇگىن Air Astana-نىڭ الماتى قالاسى تۇركسىب اۋداندىق سوتىنىڭ شەشىمىنە تۇسىرگەن اپپەلياتسيالىق شاعىمىن قاراۋ اياقتالدى. تاسىمالداۋشى مورالدىق شىعىندى 5 ميلليون تەڭگەدەن 1,5 ميلليون تەڭگەگە تومەندەتۋدى سۇراعان ەدى.
الماتى قالالىق سوتىنىڭ سوت القاسى شاعىمدى قاناعاتتاندىرۋدان باس تارتىپ، شەشىمدى ءوز كۇشىندە قالدىردى. بۇل بالانىڭ اناسى العاشقى سوت ۇكىم ەتكەندەي 5 ميلليون تەڭگە مورالدىق شىعىن الادى دەگەن ءسوز، - دەلىنگەن اۆۆوكاتتىڭ Telegram ارناسىنداعى حابارلاماسىندا.
قورعاۋشى وسى ءبىر داۋلى ءىستىڭ نۇكتەسى قويىلىپ، وندا جەڭىپ شىققاندارىنا قۋانىشتى ەكەنىن جەتكىزگەن.
- سوت قاۋلىسى زاڭدى كۇشىنە ەندى. بۇل كەيس الداعى ۋاقىتتا جاقسى ۇلگى بولاتىنى ءسوزسىز، - دەپ تۇيگەن ءسوزىن دانيلحان شاعاتايەۆ.
ەسكە سالا كەتەيىك، بىلتىر شىلدە ايىندا FlyArystan اۋە كومپانياسى اتا-اناسى سەنىپ تاپسىرعان تۇلعامەن بىرگە نيۋ- يورك قالاسىنان ۇشىپ كەلىپ، ارتىنشا ورالعا ۇشۋى ءتيىس قىز بالانى استانا اۋەجايىندا قالدىرىپ كەتكەنىن جازعان بولاتىنبىز.
كەيىن FlyArystan باسشىسى ورالدا ەگىزدەردىڭ اناسى جازيرا مۋسينامەن كەزدەستى.
وسى جاعدايدان سوڭ FlyArystan كومپانياسى جاۋاپقا تارتىلدى.
ايتا كەتەيىك، FlyArystan - Air Astana-نىڭ ەنشىلەس كومپانياسى.
ەربول جانات
اۆتور