قىتايدىڭ بۇرىنعى قورعانىس مينيسترلەرى ءولىم جازاسىنا كەسىلدى

اقپاراتقا سايكەس، 7 -مامىر كۇنى اسكەري سوت ق ك پ ورتالىق اسكەري كەڭەستىڭ بۇرىنعى مۇشەسى، مەملەكەتتىك كەڭەستىڭ بۇرىنعى مۇشەسى - قورعانىس ءمينيسترى ۆەي فەنحەنىڭ پارا الۋ ءىسى بويىنشا ۇكىم شىعاردى. سوت ۆەي ءفەنحەنى پارا العانى ءۇشىن كىنالى دەپ تانىپ، ءولىم جازاسىنا كەستى. سوت شەشىمىمەن جازانىڭ ورىندالۋى ەكى جىلعا كەيىنگە قالدىرىلدى.

سونداي- اق ول ساياسي قۇقىعىنان ءومىر بويىنا ايىرىلىپ، جەكە مۇلكى تولىعىمەن تاركىلەندى. ەكى جىلدان كەيىن ءولىم جازاسى ورىندالماي، زاڭعا سايكەس ءومىر بويى باس بوستاندىعىنان ايىرۋ جازاسىمەن الماستىرىلعان جاعدايدا، ول ءومىرىنىڭ سوڭىنا دەيىن قامالادى. جازا مەرزىمىن قىسقارتۋعا، مەرزىمىنەن بۇرىن بوساتۋعا بولمايدى.

سونداي- اق اسكەري سوت قكپ ورتالىق اسكەري كەڭەستىڭ بۇرىنعى مۇشەسى، مەملەكەتتىك كەڭەستىڭ بۇرىنعى مۇشەسى - قورعانىس ءمينيسترى لي شانفۋدىڭ دا ءىسىن قاراپ، ونى پارا العانى ءۇشىن كىنالى دەپ تانىدى. ول ءولىم جازاسىنا كەسىلدى، سوت شەشىمىمەن جازانىڭ ورىندالۋى ەكى جىلعا كەيىنگە قالدىرىلدى. اقپاراتقا سايكەس، ەكى جىلدان كەيىن ءولىم جازاسى ورىندالماي، زاڭعا سايكەس ءومىر بويى باس بوستاندىعىنان ايىرۋ جازاسىمەن الماستىرىلعان جاعدايدا، لي شانفۋ ءومىرىنىڭ سوڭىنا دەيىن قاماۋدا وتىرۋعا ءتيىس. جازا مەرزىمىن قىسقارتۋعا، مەرزىمىنەن بۇرىن بوساتۋعا تىيىم سالىنادى.

اشىق دەرەككوزدەردەن بەلگىلى بولعانداي، 68 جاستاعى لي شانفۋ قىتاي حالىق-ازاتتىق ارمياسىنىڭ سيچان سپۋتنيك ورتالىعىنىڭ قولباسشىسى، باس جابدىقتاۋ ءبولىمى باستىعىنىڭ ورىنباسارى، ورتالىق اسكەري كەڭەستىڭ قارۋ- جاراقتى دامىتۋ ءبولىمىنىڭ باسشىسى سەكىلدى قىزمەتتەردى اتقارعان. 2022 -جىلعى قىتاي كوممۋنيستىك پارتياسىنىڭ ⅩⅩ سەزىنەن كەيىن لي شانفۋ ورتالىق اسكەري كەڭەستىڭ مۇشەسى بولىپ تاعايىندالدى.

2023 -جىلعى ناۋرىزدا ول ۆەي فەنحەنىڭ ورنىنا مەملەكەتتىك كەڭەستىڭ مۇشەسى-  قورعانىس ءمينيسترى قىزمەتىنە كوتەرىلدى. دەگەنمەن سول جىلى شىلدە ايىندا لي شانفۋ ساياسات الاڭىنان ءىزىم-عايىم جوعالدى.

2023 -جىلعى 31 -تامىزدا لي شانفۋعا «پارتيا ءتارتىبى مەن مەملەكەت زاڭىن ورەسكەل بۇزدى» دەگەن ايىپ تاعىلىپ، رەسمي تەرگەۋ امالدارى باستالدى. كەلەسى ايىندا ونىڭ بۇرىنعى باسشىسى، بۇرىنعى قورعانىس ءمينيسترى ۆەي فەنحەنىڭ ۇستىنەن ءىس قوزعالعانى بەلگىلى بولدى. بيىل 72 جاستاعى ۆەي فەنحە قىتاي حالىق-ازاتتىق ارمياسىنىڭ ەكىنشى ارتيللەريالىق اسكەرىنىڭ (قازىرگى زىمىران كۇشتەرى) قولباسشىسى، سونداي-اق زىمىران كۇشتەرى قولباسشىسى قىزمەتتەرىن اتقارعان.

2017 -جىلى وتكەن ق ك پ- نىڭ XIX سەزىنەن كەيىن ول ورتالىق اسكەري كەڭەستىڭ مۇشەسى، مەملەكەتتىك كەڭەستىڭ مۇشەسى- قورعانىس ءمينيسترى بولىپ تاعايىندالعان ەدى.

2024 -جىلعى 27 ماۋسىمدا لي شانفۋ مەن ۆەي فەنحە پارتيا قاتارىنان شىعارىلدى.