قىتايلىق كومپانيا اقتاۋ جانە قۇرىق پورتتارىندا كونتەينەرلىك حاب سالۋعا قىزىعۋشىلىق تانىتىپ وتىر
كولىك ۆيتسە-ءمينيسترى تالعات لاستايەۆ China Railway Engineering قۇرىلىس كورپوراتسياسىنىڭ قۇرامىنا كىرەتىن كولىك ينفراقۇرىلىمى سالاسىنداعى 5 ءىرى قىتاي كومپانياسىنىڭ وكىلدەرىمەن كەزدەستى، دەپ حابارلايدى ق ر كولىك مينيسترلىگىنىڭ باسپا ءسوز قىزمەتى.
كەزدەسۋ بارىسىندا China Railway Group Ltd جانە China Shipbuilding Industry Corporation كومپانيالارىنىڭ تەمىرجول سالاسىنداعى جوبالاردى ىسكە اسىرۋعا، اۆتوجولدار مەن پورت ينفراقۇرىلىمىن قايتا قۇرۋعا قاتىسۋ ماسەلەلەرى تالقىلاندى.
سونىمەن قاتار اتالعان قىتايلىق كومپانيا وكىلدەرى قولدانىستاعى تەمىرجول جەلىلەرىن جاڭعىرتۋ جانە جاڭا تەمىرجول جەلىلەرىن سالۋ جونىندەگى جوبالارعا، ال China Shipbuilding Industry Corporation اقتاۋ جانە قۇرىق پورتتارىندا كونتەينەرلىك حاب سالۋعا قاتىسۋعا قىزىعۋشىلىق تانىتتى.
ءوز كەزەگىندە مينيسترلىك وكىلدەرى كولىك سالاسىنداعى كومپانيالاردىڭ تاراپىنان قىزىعۋشىلىق تۋدىراتىن جوبالار بويىنشا تولىق اقپارات بەردى. كەزدەسۋدىڭ قورىتىندىسى بويىنشا تاراپتار ىنتىماقتاستىقتى ودان ءارى دامىتۋدىڭ ماڭىزدىلىعىن اتاپ ءوتتى.
