قىتايلار ۇزاق ءومىر ءسۇرۋدىڭ قۇپياسىن اشتى

استانا. KAZINFORM - قىتايلار ۇزاق جاساۋدىڭ قۇپياسىن بىلەدى. ولاردىڭ ۇستانىمى، ءادىس-ءتاسىلى مەن ومىرگە دەگەن كوزقاراسى تاڭعاجايىپ ناتيجە بەرگەن. ءتىپتى ەلدە كەيىنگى جىلدارى قارتتاردىڭ سانى ارتتى. جاسى 130-عا جەتكەندەرى دە بار.

بۇل نە؟ سيقىر ما؟ مەديتسينا ما؟ مۇنىڭ سىرى نەدە؟

ۋەي گانگ بەيجىڭدە تۋىپ وسكەن. بۇگىندە جاسى 70-تەن اسسا دا، قيمىلى شيراق. تايدزيۋتسۋ تەحنيكاسىن جاقسى مەڭگەرگەن. ونى وعان اكەسى، ال اكەسىنە باباسى ۇيرەتىپ كەتكەن ونەر ءتۇرى. كۇندەلىكتى ساياباققا شىعىپ قاتارلاستارىن جاتتىقتىرادى.

ۋەي گانگ، بەيجىڭ قالاسىنىڭ تۇرعىنى:

- تايدزيۋتسۋمەن 6 جاسىمنان باستاپ شۇعىلدانامىن. وسى جاسقا كەلىپ ءبىر اۋىرىپ كورگەن ەمەسپىن. تايدزيۋتسۋ - بۇل كونە جەكپە-جەك تەحنيكالارىنىڭ ءبىرى. ۇرپاقتان-ۇرپاققا بەرىلىپ بۇگىنگى كۇنگە جەتتى. قازىر كوبىنەسە جاتتىعۋ رەتىندە قولدانىلادى. دەنساۋلىققا وتە پايدالى. ادامنىڭ تانىمەن قاتار جانىن دا شىنىقتىرادى. قيمىل كەزىندە بۇكىل ىشكى ورگاندار مەن دەنە مۇشەلەرى قوزعالىستا بولادى. قان اينالىمىن جاقسارتادى.

بەيجىڭدە قاي جەرگە بارساڭ دا سپورتپەن شۇعىلدانىپ جۇرگەن ادامداردى كورۋگە بولادى. حالقى كەز كەلگەن جەرگە تۇرا قالىپ جاتتىعۋ جاساۋدى ادەتكە اينالدىرعان. ءبىرى كۋنگ- فۋ، ەكىنشىسى تايدزيۋتسۋ، ەندى ءبىرى بي بيلەيدى. لي چجي بالا كۇنىنەن تايدزيۋتسۋ تاسىلىمەن جاتتىعادى. قۇربىلارىن جيناپ كۇندە شىنىعادى. 82 جاسىندا جەڭىل ءارى شاپشاڭ قيمىلدايدى. ونىڭ سىرىن اق شاشتى اجەيلەردەن سۇراپ بىلدىك.

لي چجي، زەينەتكەر:

- ۇزاق جاساۋدىڭ قۇپياسى - ەڭبەك. ۋاقىتىمەن ۇيىقتاپ، دۇرىس تاماقتانۋ قاجەت. كوبىنەسە بۇرشاق جارمالارىنان جاسالعان تاعام جەيمىن. ەتتى از جەۋگە تىرىسامىن. ەڭ باستىسى، جاتتىعۋدى توقتاتپاۋ كەرەك. بۇل وتە ماڭىزدى.

حۋن حۋنگ، زەينەتكەر:

- ەشقانداي دا قۇپيا جوق. زياندى ادەتتەردەن ارىلىپ، دارۋمەنگە باي تاعام تۇتىنۋ كەرەك. تاماقتى ەش ۋاقىتتا تويىپ جەمەيمىن. مولشەرمەن عانا. ونىڭ ءبارىن دەنساۋلىق سىر بەرىپ، ابدەن اسقىنعاندا ەمەس، ەرتە كەزدەن قولعا العان دۇرىس.

جاۋ شيجە، زەينەتكەر:

- تاڭعى 5:30-دا تۇرامىن. كۇندە وسى جەردە جينالىپ، جاتتىعۋدى قايتالايمىز. ۋاقىتتى بوس وتكىزۋگە بولمايدى. مەنىڭ ءۇيىم قاشىقتا. كۇندە وسىندا جاياۋ كەلەم. كەمىندە 3-4 شاقىرىم جۇرەمىن. ەڭ باستىسى، اياقتى كۇشەيتۋ كەرەك. ۇنەمى قوزعالىستىڭ ارقاسىندا قان اينالىمى جاقسارىپ، سەرىگە تۇسەسىڭ.

ۇزاق جاساۋدىڭ نەگىزى فاكتورلارىنىڭ ءبىرى - دۇرىس تاماقتانۋ. تەك دارۋمەنگە باي، كوكونىستەردى تۇتىنادى. ءاربىر ءىستى قاتاڭ جوسپارلى تۇردە جاسايدى. ەتتى از جەيدى. ەت پەن مايلى تاعامدار قان قىسىمىن ارتتىرىپ، قانت ديابەتىنە اكەپ سوعادى.

پەن جيانكان، قالالىق ەمحانا دارىگەرى:

- ۇزاق ءومىر سۇرگىڭىز كەلسە، تازا اۋادا ءجيى سەرۋەندەۋ كەرەك. ۇيقى 6 ساعاتتان كەم، 7 ساعاتتان ارتىق بولماۋى ءتيىس. شاي مەن كوفە، شىلىم مەن ىشىمدىكتەن باس تارتقان دۇرىس. كۇندەلىكتى ىستىق ۆاننا قابىلداڭىز. بويداق بولساڭىز، تەزىرەك ۇيلەنىڭىز. قارت ادامداردا اس قورىتۋ جۇيەسىنىڭ جۇمىسى تومەندەيدى. ىشكى ورگانداردى قالىپقا كەلتىرۋ ءۇشىن مالدىڭ وكپە- باۋىرى، جۇرەك پەن بۇيرەگىن كوبىرەك جەۋ كەرەك. قۋىرىلعان تاماقتان باس تارتۋ قاجەت.

ءداندى- داقىلدار، بۇرشاق جارمالارىن جەگەن ابزال. ول ىشەك- قۇرىلىستى تازارتىپ، جۇرەك- قان تامىرلارى اۋرۋلارىنىڭ الدىن الۋعا سەپ بولادى. بۇلاردى ساقتاماساڭ، مەديتسينا دا كومەكتەسپەيدى. بۇگىندە قىتايدا قارت ادامدار سانى ارتتى. ەلدىڭ ازاماتتىق ىستەر جونىندەگى مينيسترلىگى بۇكىل قىتاي حالقىنىڭ % 21- ءى قاريالار دەپ جاريالادى. بۇگىندە كورشى مەملەكەتتە 60 جاستان اسقان كىسى سانى 300 ميلليونعا جۋىقتاعان. بۇعان ارينە ەلدەگى 1980 -جىلدارداعى «ءبىر وتباسىعا ءبىر بالا» ساياساتى اسەر ەتكەن. الايدا ماسەلە ول جونىندە ەمەس، سول قارت ادامداردىڭ ۇزاق جاساۋىندا.

24.kz