قىتايدىڭ ىسكەرلىك توپتارى ا ق ش- تىڭ كەدەندىك باج سالىعىن كوتەرۋىنە قارسى

استانا. KAZINFORM - بۇل تۋرالى جەكسەنبى كۇنى قىتايدىڭ حالىقارالىق ساۋدانى دامىتۋعا جاردەمدەسۋ جونىندەگى كەڭەسىنىڭ رەسمي وكىلى مالىمدەدى، دەپ حابارلايدى شينحۋا اقپارات اگەنتتىگى.

كوميتەت وكىلىنىڭ مالىمدەمەسىندە ايتىلعانداي، قىتايلىق ىسكەرلىك ورتالارىنىڭ باسشىلارى ا ق ش- تىڭ قىتايدان اكەلىنەتىن تاۋارلارعا قوسىمشا 10 پايىزدىق باج سالىعىن ەنگىزۋ شەشىمىنە ءۇزىلدى-كەسىلدى قارسى.

ونىڭ ايتۋىنشا، قۇراما شتاتتاردىڭ ءبىرجاقتى قوسىمشا باج سالىعىن ەنگىزۋى دۇنيەجۇزىلىك ساۋدا ۇيىمىنىڭ (د س ۇ) ەرەجەلەرىن ورەسكەل بۇزادى. بۇل ءۇشىن كوپتەگەن امەريكالىق بيزنەس پەن تۇتىنۋشىلار تولەۋگە ءماجبۇر بولادى.

بۇل قادام قىتاي مەن ا ق ش اراسىنداعى قالىپتى ساۋدا-ەكونوميكالىق ىنتىماقتاستىققا نۇقسان كەلتىرەدى. سونداي-اق جاھاندىق وندىرىستىك-وتكىزۋ تىزبەگىنىڭ تۇراقتىلىعىنا قاۋىپ توندىرەدى، دەپ قوستى ول.

- ساۋدا جانە تاريفتىك سوعىستاردا جەڭىمپازدار جوق، - دەپ اتاپ ءوتتى رەسمي وكىل.

ول ا ق ش-تىڭ قاتە ارەكەتتەرى ونىڭ ىشكى ماسەلەلەرىن شەشپەيتىنىن، كەرىسىنشە قىتاي-امەريكان قارىم- قاتىناسىنا نۇقسان كەلتىرىپ، جاھاندىق ەكونوميكالىق دامۋعا كەرى اسەرىن تيگىزەتىنىن قوسىپ ءوتتى.

كوميتەت وكىلىنىڭ ايتۋىنشا، قىتاي ىسكەرلىك ورتالارى ا ق ش تاراپىن ءوزىنىڭ قاتە ادىستەرىن دەرەۋ تۇزەتىپ، قىتايعا قاراما-قارسى باعىتتا ءجۇرىپ، ەكى ەلدىڭ جانە بۇكىل الەمنىڭ ىسكەرلىك توپتارىنىڭ ءوزارا پايداسى ءۇشىن الەمدىك ەكونوميكاعا تۇراقتىلىق پەن وڭ ەنەرگيا اكەلۋ ءۇشىن باسقا ەلدەرمەن ىنتىماقتاستىقتى نىعايتۋعا شاقىرادى.

ەسكە سالا كەتسەك، 17-قاڭتار كۇنى قىتاي ءتوراعاسى شي جينپيڭ ا ق ش- تىڭ جاڭادان سايلانعان پرەزيدەنتى دونالد ترامپپەن تەلەفون ارقىلى سويلەستى.

قىتاي مەن ا ق ش ەكى ەلدىڭ جانە الەمنىڭ يگىلىگى ءۇشىن سەرىكتەس ءارى دوس بولا الادى. بۇل تۋرالى قىتاي ءتوراعاسى شي جينپيڭ ا ق ش- تىڭ جاڭادان سايلانعان پرەزيدەنتى دونالد ترامپپەن تەلەفون ارقىلى سويلەسكەن كەزدە ايتتى.

اۆتور

زارينا تۋعانبايەۆا