قىتايدىڭ ورتالىق ازيامەن ساۋدا اينالىمى 2024 -جىلى رەكوردتىق كورسەتكىشكە جەتتى
استانا. KAZINFORM - قىتايدىڭ ورتالىق ازيا ەلدەرىمەن تاۋار اينالىمى 2024 -جىلدىڭ قورىتىندىسى بويىنشا 94,82 ميلليارد دوللاردى قۇرادى، دەپ حابارلايدى Kazinform مەنشىكتى ءتىلشىسى.

بۇعان قىتاي حالىق رەسپۋبليكاسىنىڭ باس كەدەن باسقارماسى جاريالاعان مالىمەتتەر دالەل.
قىتايدىڭ ورتالىق ازياداعى ساۋدا سەرىكتەستەرى رەيتينگىندە قازاقستان ءبىرىنشى ورىندا - 43,82 ميلليارد دوللار، قىرعىزستان ەكىنشى ورىندا (22,71 ميلليارد دوللار)، ءۇشىنشى ورىندا وزبەكستان (13,78 دوللار)، تۇرىكمەنستان ءتورتىنشى ورىندا (10,65 ميلليارد دوللار). ۇزدىك بەستىكتى 3,86 ميلليارد دوللارمەن تاجىكستان تۇيىندەدى.
2023 -جىلى قىتايدىڭ ورتالىق ازيا ەلدەرىمەن تاۋار اينالىمى 89,4 ميلليارد دوللاردى قۇرادى.
ايتا كەتەيىك، قىتايدىڭ باسقا ەلدەرمەن ساۋدا كولەمى 2024 -جىلى 6,16 تريلليون دوللارعا جەتكەن. قىتايدىڭ ساۋدا پروفيتسيتى 1 تريلليون دوللارعا جۋىقتادى.
بۇعان دەيىن قىتاي ورتالىق ازيا ەلدەرىمەن بىرلەسىپ ونەركاسىپتىك كووپەراتسيانى دامىتۋعا نيەتتى ەكەنى حابارلاندى.
اۆتور
ەركەجان سماعۇلوۆا