قىتايداعى جاپوندىقتارعا كوپشىلىك الدىندا جاپون تىلىندە سويلەمەۋ كەرەكتىگى ەسكەرتىلدى

استانا. KAZINFORM - قىتايدا 13 -جەلتوقسانداعى «نانجيڭ قىرعىنىن» ەسكە الۋ كۇنى جاقىنداپ قالعاندىقتان، جاپونيا ەلشىلىگى مەن ونداعى كونسۋلدىقتار جەرگىلىكتى ۇكىمەت پەن پوليتسيادان قىتايداعى جاپوندىقتاردىڭ قاۋىپسىزدىگىن قامتاماسىز ەتۋدى سۇرادى.

جاپوندىق ب ا ق yahoojapan - نىڭ حابارلاۋىنشا، جاپونيانىڭ قىتايداعى ەلشىلىگى جاقىندا قىتايدا تۇراتىن جاپوندىقتاردىڭ ءوز قاۋىپسىزدىگىنە ءمان بەرۋىن ەسكەرتەتىن حابارلاما شىعاردى.

- جەلتوقساننىڭ 13- ءى «نانجيڭ قىرعىنىن» ەسكە الۋ كۇنى. تاريحقا قاتىستى وسى كۇندەرى، قىتايدا بولعان بەيتاراپ زيان كەلتىرۋ وقيعالارىن ەسكەرە وتىرىپ، قىتايداعى بارلىق جاپون ازاماتتارى كوشەگە شىققاندا ءوز قاۋىپسىزدىگىن قورعاۋعا بۇرىنعىدان دا كوبىرەك كوڭىل ءبولۋى كەرەك. اينالاڭىزعا مۇقيات بولىڭىز جانە قاۋىپسىزدىكتى قامتاماسىز ەتىڭىز، اسىرەسە بالالارىڭىزدى سىرتقا شىعارعان كەزدە، ءتيىستى ساقتىق شارالارىن ۇستانىڭىز - دەپ جازدى قىتايداعى جاپونيا ەلشىلىگى حابارلامادا.

ەلشىلىك قىتايداعى جاپون ازاماتتارىنا قوعامدىق ورىنداردا جاپون تىلىندە سويلەسۋدى مۇمكىندىگىنشە ازايتۋدى ۇسىنادى. سونىمەن قاتار، جاپون ازاماتتارىنا جاپوندىق ەكەنىن وڭاي انىقتايتىن كيىم مەن زاتتاردى كيۋدەن نەمەسە الىپ جۇرۋدەن اۋلاق بولۋعا كەڭەس بەردى.

ب ا ق- تىڭ حابارلاۋىنشا، جاپونيا ەلشىلىگى مەن كونسۋلدىقتارى «نانجيڭ قىرعىنىن» ەسكە الۋ كەزەڭىندە قىتايداعى جاپون ازاماتتارىن قورعاۋ شارالارىن كۇشەيتۋ تۋرالى قىتايدىڭ جەرگىلىكتى ۇكىمەتى مەن پوليتسياسىنا ءوتىنىش جاساعان.

قىتاي ۇكىمەتى بەكىتۋىنە ساي جىل سايىن 13- جەلتوقساندا «نانجيڭ قىرعىنىنىڭ قۇرباندارىن ازا تۇتۋ كۇنى» رەتىندە ەسكە الادى. ەكىنشى دۇنيەجۇزىلىك سوعىس كەزىندە جاپون اسكەرلەرى قىتايدىڭ سول كەزدەگى استاناسى نانجيڭدى باسىپ الىپ، وندا كوپتەگەن بەيبىت تۇرعىنداردى ولتىرگەن.

ايتا كەتەيىك، 18-قىركۇيەكتە قىتايدىڭ گۋاڭدۇڭ پروۆينتسياسىنىڭ شىنجىن قالاسىنداعى «جاپون مەكتەبىندە» وقيتىن جاپوندىق بالاعا بەلگىسىز قىتايلىق ەر ادام شابۋىل جاساپ، ءولتىرىپ كەتكەنىن حابارلاعان بولاتىنبىز.

اۆتور

مۇقتار مۇرات