قىتايدا قانداسىمىز جەڭىل اتلەتيكادان ءبىر اپتادا ەكى رەت باس جۇلدە جەڭىپ الدى
استانا. KAZINFORM - قىتايدا تۇراتىن قانداسىمىز دينا نۇرلان قىزى جەڭىل اتلەتيكادان جابىق كەشەندەگى قىتاي چەمپيوناتىندا بيىكتىككە سەكىرۋ جارىسىنان باس جۇلدەنى قانجىعالادى، دەپ حابارلايدى قىتايلىق kazakcnr.com (CNR) حابارلادى.
جەڭىل اتلەتيكادان جابىق كەشەندەگى ايەلدەر اراسىنداعى بيىكتىككە سەكىرۋ جارىسىندا دينا نۇرلان قىزى 1.87 مەترلىك ناتيجەمەن باس جۇلدەنى قانجىعالاعان. ول وسىدان ءبىر اپتا بۇرىن جەڭىل اتلەتيكادان جابىق كەشەندە وتكەن ۇلتتىق گران-پري جارىسىندا دا 1.87 مەترلىك كورسەتكىشپەن چەمپيون اتانعان بولاتىن.
دينا نۇرلان قىزى 1,90 مەتردى باعىندىرا الاتىنىنا سەنىمدى. ول جاتتىعۋدا 1,90 مەتردەن اسىپ كەتكەنىن جانە كەلەسى جارىستاردا ءوزىنىڭ وسى مەجەنى باعىندىرۋعا تىرىساتىنىن ايتقان.
ايتا كەتەيىك، دينا نۇرلان قىزى 1998 -جىلى قىتايدىڭ قۇلجا اۋدانىنىڭ ويمانبۇلاق اۋىلىندا دۇنيەگە كەلگەن. 15 جاسىندا شىنجاڭ قۇراماسىنا قابىلدانعان. ول 2021 -جىلعى جەڭىل اتلەتيكادان ۇلتتىق چەمپيوناتتا بيىكتىككە سەكىرۋدەن 1,84 مەتر كورسەتكىشىمەن ەكىنشى ورىندى جەڭىپ السا، 2023 -جىلعى جەڭىل اتلەتيكادان ەل چەمپيوناتىندا باس جۇلدەنى ەنشىلەگەن. دينا نۇرلان قىزىنىڭ بويىنىڭ بيىكتىگى 1,87 مەتر. ول شىنجاڭداعى بيىكتىككە سەكىرۋ سپورتشىلارى اراسىنداعى ەرەكشە تالانت يەسى.
ەسكە سالا كەتەيىك، بۇعان دەيىن تيبەتتە كوشپەلىلەر مادەنيەتىن ايگىلەيتىن ەرەكشە شايحانا اشىلعانى تۋرالى جازعان بولاتىنبىز.
اۆتور
باقىتجول كاكەش
