قىتايعا كيىكتى سىيعا تارتۋ پروتسەسى قالاي ءجۇرىپ جاتىر

- قىتاي حالىق رەسپۋبليكاسىنا 1500 كيىكتى بەرۋ ماسەلەسىنە توقتالساق، قازاقستان جاعى كورشى ەلمەن ءبىرقاتار كەلىسسوز جۇرگىزدى. كيىكتى قورعاۋ سالاسىنداعى ىنتىماقتاستىق ماسەلەلەرى تالقىلاندى، سونداي-اق ق ح ر تاراپىمەن ءوزارا تۇسىنىستىك تۋرالى مەموراندۋمعا قول قويىلدى. سونىمەن قاتار، قىتايلىق تاراپ كيىكتەردى تەك اۋسىل اۋرۋىنان تازا دەپ تانىلعان قازاقستان رەسپۋبليكاسى وبلىستارىنىڭ اۋماعىندا اۋلاۋ قاجەتتىلىگى تۋرالى حابارلادى، - دەلىنگەن ورمان شارۋاشىلىعى جانە جانۋارلار دۇنيەسى كوميتەتىنىڭ Kazinform اگەنتتىگىنە بەرگەن جاۋابىندا.

ايتا كەتۋ كەرەك، 2026 -جىلعى 22 -مامىردا پاريجدە وتكەن دۇنيەجۇزىلىك جانۋارلار دەنساۋلىعى ۇيىمىنىڭ 93- باس سەسسياسىندا قازاقستانعا رەسمي تۇردە ۆاكسيناتسيا جۇرگىزىلەتىن اۋسىلدان تازا ايماق مارتەبەسى بەرىلدى.

- وسىعان بايلانىستى قازىرگى ۋاقىتتا تاراپتار كيىكتەردى ق ح ر- عا ەكسپورتتاۋ ءۇشىن ۆەتەريناريالىق-سانيتارلىق سەرتيفيكاتتى ازىرلەۋدە. بۇل باعىتتاعى جۇمىستار جالعاسىپ جاتىر، - دەپ ءتۇسىندىردى ۆەدومستۆو.

ەسكە سالساق، بىلتىر قازاقستان قىتايعا 1500 كيىكتى سىيعا تارتاتىنى ءمالىم بولدى.

اتاپ ايتقاندا، كيىكتەردى قابىلداۋشى ەل ولاردى ارى قاراي ۇستاۋعا قولايلى جاعدايلار جاساۋى ءتيىس.

بۇل جاعدايلار كيىكتەردىڭ تابيعي مەكەندەۋ ورتاسىنا جاقىن بولۋى، ولاردىڭ قورەكتەنۋىنە، كوبەيۋىنە جانە اۋرۋلاردان قورعالۋىنا قاجەت ينفراقۇرىلىمدى قامتۋى كەرەك.

بۇل رەتتە قازاقستاندىق تاراپ جىبەرىلەتىن جانۋارلار ءۇشىن بارلىق قاجەت جاعدايلاردىڭ جاسالعانىنا كوز جەتكىزۋ ماقساتىندا ءتيىستى تەكسەرۋلەر مەن مونيتورينگ جۇرگىزۋگە قۇقىلى.