قىتايدا تۋريستەر فيلمنىڭ باستى كەيىپكەرى بولا الادى

ساپاردىڭ اياعىندا تۋريستەرگە وزدەرى تۇسكەن كارتينا تابىستالادى. جوبانى ۇيىمداستىرۋشىلاردىڭ ايتۋىنشا، بۇل جوبانىڭ جۇرتقا ۇناعانى سونشالىق، تۋريستەر دە، فيلمگە تۇسكىسى كەلەتىندەر دە كۇرت كوبەيگەن. جىبەك كويلەك پەن نەفريت اشەكەيلەرى جانە بىرنەشە دۋبل. مۇندا كەلگەن ءار تۋريست تاريحي حيكايانىڭ باستى كەيىپكەرى بولا الادى.

ءتۇسىرىلىم الاڭىندا بەيجىڭدەگى كونە سارايدىڭ كوشىرمەسى دە بوي كوتەرگەن. ونى «تىيىم سالىنعان قالا» دەپ تە اتايدى. بۇرىن مىڭداعان قىتاي كارتيناسى مەن تەلەحيكاياسى تۇسىرىلگەن بۇل ستۋديا ەندى ساياحاتشىلاردى كوپ تارتاتىن ەرەكشە تۋريستىك ورتالىققا اينالعان.

كلەر حۋانگ، تۋريست:

- بالا كەزىمدە رەجيسسەر بولۋدى ارماندايتىنمىن. ءتۇرلى قويىلىمداردىڭ سسەناريىن ويدان شىعارىپ، ۇيىمداستىرىپ جۇرەتىنمىن. بۇگىن سول بالا كۇنگى ارمانىم شىندىققا اينالعانداي بولدى. ءوزىمنىڭ دە فيلمگە تۇسۋىمە مۇمكىندىك تۋدى.

ءتۇسىرىلىم الاڭىنىڭ قوناقتارى 20-دان اسا سسەناريدىڭ ىشىنەن بىرەۋىن تاڭداي الادى. ءبىرى ساراي ىشىندەگى قۇپيا وقيعالارعا تولى بولسا، ەندى بىرىندە ماحاببات داستانى باياندالادى. ءتۇسىرىلىم جارتى ساعاتقا سوزىلادى. باعاسى - 218 يۋان. بۇل ءبىزدىڭ اقشاعا شاققاندا شامامەن 15 مىڭ تەڭگە. ال ءبىر جارىم مينۋتتىق دايىن كارتينا ءۇش كۇندە دايىن بولادى.

سۋرنامەد سە، تۋريست:

- قازىر ادامدار ءۇشىن ماتەريالدىق قاجەتتىلىكتەردەن بولەك، ەرەكشە اسەر الىپ، ەستە قالارلىق ساتتەردى باستان كەشىرۋ دە ماڭىزدى. كوبى ادەمى كيىنىپ، ەرەكشە كۇي كەشكىسى كەلەدى. بۇل وتە كەرەمەت مۇمكىندىك دەپ ويلايمىن.

بيىل تامىزدا تۇساۋى كەسىلگەن تۋريستىك ورتالىققا ەكى مىڭنان اسا ادام كەلگەن. اسىرەسە دەمالىس پەن مەرەكە كۇندەرى كىسى قاراسى قالىڭ. بۇرىن مۇنداي مۇمكىندىك تەك ۇلكەن توپتارعا بەرىلەتىن. قازىر جالعىز ءوزى نەمەسە جۇبىمەن بولسىن، كەز كەلگەن تۋريست فيلمگە تۇسە الادى.

اۆتورى: زاينۇر بايجىگىت

24.kz