قىتايدان ەۋروپاعا قازاقستان ارقىلى تاسىمالداناتىن جۇك كولەمى ءوستى

استانا. قازاقپارات - كەيىنگى 9 يدا ءبىر عانا قورعاس پورتى ارقىلى 7 مىڭ جۇك پويىزى وتكەن. ەلدە قالىپتاسقان حالىقارالىق دالىزدەر ترانس شەكارالىق ساۋدا مەن ترانزيتتىڭ ارتۋىنا تۇرتكى بولىپ وتىر، دەپ حابارلايدى 24KZ.

قازاقستاننىڭ گەوگرافيالىق ورنالاسۋى حالىقارالىق ساۋداداعى ەكونوميكالىق ارتىقشىلىققا اينالدى. بۇل ستراتەگيالىق مۇمكىندىكتى مەملەكەت باسشىسى الدىن الا كورىپ، ەلىمىزدىڭ ترانزيتتىك- لوگيستيكالىق الەۋەتىن نىعايتۋدى نەگىزگى باعىت رەتىندە ايقىنداپ بەرگەن. ەندى قازىر جالعىز قىتاي ەمەس، بۇكىل ەۋروپا قازاقستاننىڭ ترانزيتتىك الەۋەتىن مويىنداپ، ەلىمىزگە قاراي تارتىلا باستادى.

قازىر قىتاي ەلى ەۋروپاعا ەكسپورتتىق تاۋارلارىن قازاقستان ارقىلى جىبەرگەندى ءجون كورەدى. كورشى ەل قۇرلىقپەن جونەلتەتىن جۇكتەرىنىڭ 85 پايىزىن ءبىزدىڭ جولدارمەن تاسىمالداپ وتىر. ويتكەنى بۇل باعىت تۇراقتى، قاۋىپسىز، ەڭ باستىسى، جۇك جىلدام جەتەدى. ماسەلەن، ءبىر عانا قورعاس پورتى قىتايدى 18 مەملەكەتتىڭ 46 قالا جانە ايماعىمەن بايلانىستىرىپ تۇر. بۇل جولمەن ەۋروپاعا كەيىنگى 9 ايدا 12 ميلليون توننا جۇك جونەلتىلگەن. بۇگىندە ەلىمىزدىڭ اۋماعىندا 12 حالىقارالىق كولىك ءدالىزى بار. ونىڭ بەسەۋى تەمىرجول، جەتەۋى اۆتوموبيل جولدارى. كەيىنگى 5 جىلدا قازاقستاندا سالىنعان جانە قايتا جاڭعىرتىلعان تەمىرجول جەلىسى 5 مىڭ شاقىرىمعا جۋىقتايدى. تاعى 11 مىڭى جوندەلىپ جاتىر. الداعى جىلدارى 2 مىڭ شاقىرىمىنان اسا جاڭا تەمىرجول سالۋ جوسپاردا.

 بۇل ەلىمىزدىڭ ەۋروپا مەن ازيا اراسىنداعى ترانزيتتىك كوپىر رەتىندەگى ستراتەگيالىق ءرولىن كۇشەيتەدى. سونداي-اق ۇلتتىق كولىك-لوگيستيكا جۇيەسىنىڭ تيىمدىلىگىن ارتتىرا تۇسەدى. قازاقستان مەن قىتاي جۇك تاسىمالى دا جىلدان جىلعا ارتىپ كەلەدى. ەكى ەل اراسىنداعى كولىك بايلانىسىنىڭ ناتيجەسىندە وتكەن جىلى تەمىرجولمەن تاسىمالدانعان جۇك كولەمى 11,1 پايىزعا ءوستى. ال 2026 -جىلدىڭ العاشقى 8 ايىندا جۇك تاسىمالى 25,1 ميلليون توننادان اسىپ، 8,3 پايىزعا جەتتى. ەكى ال اراسىن جالعاپ جاتقان دوستىق-مويىنتى جەلىسىنىڭ ەكىنشى كەزەڭى پايدالانۋعا بەرىلىپ، وتكىزۋ قابىلەتى ەداۋىر ارتتى. قازىر قازاقستان مەن قىتاي اراسىنداعى ءۇشىنشى شەكارالىق تەمىرجول وتكەلىن قالىپتاستىراتىن باقتى-اياگوز تەمىرجول جوباسى ىسكە اسىرىلىپ جاتىر. سونىمەن قاتار الاتاۋ جانە التىنكول- قورعاس وتكىزۋ بەكەتتەرىنىڭ وتكىزۋ مۇمكىندىكتەرى كەڭەيتىلۋدە.