قىتايدا جانارماي باعاسى قىمباتتادى
استانا. قازاقپارات - قىتايدا جانارماي باعاسى تاعى قىمباتتادى. قازىر بەنزين مەن ديزەلدىڭ ليترى 10 يۋانعا، ال كەيبىر شالعاي وڭىرلەرىندە 11 يۋانعا دەيىن كوتەرىلىپ كەتتى، دەپ حابارلايدى 24KZ.
ءبىزدىڭ اقشامەن ساناساق، شامامەن جەتى ءجۇز ەلۋ تەڭگە. ەل بيلىگى نارىقتى قاتاڭ باقىلاۋعا الىپ، ينسپەكسيالىق قاداعالاۋدى كۇشەيتتى. بۇل جونىندە كورشى ەلدىڭ دامۋ جانە رەفورمالار جونىندەگى ۇلتتىق كوميسسياسى مالىمدەدى. بۇعان تاياۋ شىعىستاعى گەوساياسي جاعدايدىڭ شيەلەنىسە ءتۇسۋى تۇرتكى بولدى.
ەندى كورشى ەلدىڭ ۇكىمەتى تۇتىنۋشىلارعا تۇسكەن سالماق پەن ءوندىرىستى رەتتەۋ ءۇشىن مۇناي ونىمدەرىنىڭ باعاسىنا تۇزەتۋ ەنگىزۋگە ءماجبۇر بولىپ وتىر.
بيان چجەن، قىتايدىڭ ۇلتتىق دامۋ جانە رەفورمالار جونىندەگى كوميسسياسى باعا جانە سەرتيفيكاتتاۋ ورتالىعىنىڭ ديرەكتورى:
- كەيىنگى ون كۇندە شيكى مۇنايدىڭ حالىقارالىق ورتاشا باعاسى كۇرت ءوستى. بۇل باعا تۇراقتىلىعىنا كەرى اسەر ەتىپ وتىر. قازىر ىشكى نارىقتى رەتتەپ، تۇتىنۋشىلارعا تۇسكەن اۋىرتپاشىلىقتى جەڭىلدەتۋ شارالارى قابىلدانۋدا. سونىمەن قاتار مۇناي ونىمدەرىنىڭ قاۋىپسىز جانە تۇراقتى جەتكىزىلۋىن قامتاماسىز ەتۋ اسا ماڭىزدى. وسى ەكى ورتاداعى تەپە-تەڭدىكتى تابۋ ءۇشىن قىتاي مۇناي ونىمدەرىنىڭ باعاسىن تۇزەتۋ شارالارىن قايتا ەنگىزدى.
24.kz
