قىتايدا ج ي كومەگىمەن تۇسىرىلگەن العاشقى تولىقمەتراجدى فيلم كورەرمەن جيناي المادى

Bona Film Group كومپانياسى تۇسىرگەن «سانسيندۋي: وتكەننەن كەلەشەككە» عىلىمي-فانتاستيكالىق فيلمى 23 -قازاندا پروكاتقا شىقتى. كارتينا كينوتەاترلارعا ارنالعان العاشقى گيپەررەاليستىك جاساندى ينتەللەكت جوباسى رەتىندە تانىستىرىلدى.

100 مينۋتقا سوزىلاتىن فيلمدە ەجەلگى قىتايدىڭ سانسيندۋي وركەنيەتى مەن بولاشاق الەمىنىڭ تىنىس-تىرشىلىگى ءوزارا ساباقتاسادى. سيۋجەت كونە تاڭبالاردىڭ قۇپياسىن اشىپ، اسا دامىعان جاساندى ينتەللەكتتىڭ ۇستەمدىگىنە تۇسكەن بولاشاق ادامزاتتى قۇتقارۋعا ۇمتىلعان ارحەولوگتىڭ توڭىرەگىندە ءوربيدى.

كورەرمەندەر مەن سالا ماماندارىنىڭ باعالاۋىنشا، فيلمنىڭ كوركەمدىك ساپاسى كينوتەاترلاردا كورسەتىلەتىن تۋىندىلار دەڭگەيىنەن تومەن. ولار تۋىندىنىڭ ساپاسىن جاساندى ينتەللەكت كومەگىمەن تۇسىرىلگەن العاشقى قىسقامەتراجدى فيلمدەرمەن سالىستىرادى.

— اۆتورلاردىڭ قولىندا تولىققاندى سسەناري ەمەس، بىرنەشە تۇجىرىمدامالىق ەسكيز عانا بولعان سياقتى. ولار باستاپقى ۇلگىلەر نەگىزىندە كورىنىستەردى جاي عانا جاساندى ينتەللەكت ارقىلى قۇراستىرعانداي اسەر قالدىرادى. كادرلار مەن ساحنالاردىڭ ءوزارا ۇيلەسپەۋى دە وسىدان تۋىنداعان، ال دىبىستىق بەزەندىرۋدىڭ ساپاسى كوڭىل كونشىتپەيدى. ەگەر فيلم كورەرمەنگە اقىلى تۇردە ۇسىنىلسا، مۇنداي كەمشىلىكتەردى جاساندى ينتەللەكت كومەگىمەن جاسالعانىمەن اقتاۋعا بولمايدى، — دەدى كينەماتوگرافيست گۋاڭ يادي.

گۋاڭنىڭ ايتۋىنشا، جاساندى ينتەللەكت كومەگىمەن كينو تۇسىرۋدەگى باستى تەحنولوگيالىق كەدەرگى — ءوندىرىس پروتسەسىنىڭ ۇزاققا سوزىلۋى. فيلمدى ازىرلەۋگە بىرنەشە جىل كەتكەن. ال گەنەراتيۆتى مودەلدەر اپتا سايىن جاڭارىپ وتىرادى. سونىڭ ناتيجەسىندە تۋىندى جارىققا شىققانشا ونى جاساۋعا پايدالانىلعان قۇرالدار ەسكىرىپ ۇلگەرگەن.

بۇعان دەيىن قىتايدا جاڭا ميكرو سەريالداردىڭ %90- دان استامى ج ي كومەگىمەن جاسالاتىنىن حابارلاعانبىز.