قىتاي ترانزيتى ارقىلى قازاقستان ەكونوميكاسىنا 263 ميلليارد تەڭگە قاراجات تۇسپەك
بيىل 9 ايدا اۆتوكولىكپەن 5.5 ميلليون توننا جۇك تاسىمالداندى. بۇل تۋرالى ۇكىمەت وتىرىسىندا كولىك ۆيتسە- ءمينيسترى ءساتجان ابلاليەۆ ايتتى، دەپ حابارلايدى Kazinform.
«اۆتوكولىك تاسىمالى - ەل ەكونوميكاسىنىڭ تۇراقتى دامۋىنا وزىندىك سەپتىگىن تيگىزەتىن باستى سالالاردىڭ ءبىرى. ەلىمىزدە الىس شەتەلدەرگە جۇك تاسىمالدايتىن 370 وتاندىق كومپانيا 7 مىڭ 6 ءجۇز اۆتوكولىكپەن جۇمىس ىستەيدى. تاسىمالداردى ۇكىمەتارالىق كەلىسىمدەر اياسىندا 42 ەل جۇزەگە اسىرادى. ولاردىڭ نەگىزىندە جىل سايىن 170 مىڭعا جۋىق رۇقسات بەرۋ بلانكىلەرى الماستىرىلادى. بيىل 9 ايدىڭ قورىتىندىسى بويىنشا جۇك تاسىمالى 5,5 ميلليون توننانى قۇرادى. بۇل وتكەن جىلمەن سالىستىرعاندا 22 پايىزعا ارتىپ وتىر. تاسىمالداعى وتاندىق وپەراتورلاردىڭ ۇلەسى 42 پايىزدى قۇرايدى»، - دەدى ۆيتسە- مينيستر.
ونىڭ اتاپ وتۋىنشە، ترانزيتتىك تاسىمالداردا دا وڭ ءۇردىس بايقالادى. وتكەن جىلمەن سالىستىرعاندا ونداعى ءوسىم 44 پايىز دەڭگەيىندە. نەگىزگى جۇك كولەمى قىتاي ەلىنە تيەسىلى جانە ول سوڭعى جىلدارى 2 ەسەگە ءوستى.
«سونىمەن قاتار، ساراپتامالىق مالىمەتتەرگە سايكەس قىتايدان ەۋروپاعا جىل سايىن تەڭىز جولىمەن 1 ميلليارد 600 ميلليون تونناعا دەيىن جۇك تاسىمالدانادى. ءوز كەزەگىندە ەلىمىز ارقىلى اۆتوكولىكپەن تاسىلاتىن ترانزيتتىك جۇك كولەمى 1 پايىزدان اسپايدى. الەمدىك تاجىريبەدە تەز بۇلىنەتىن، مەديتسينالىق، قىمبات جانە قىسقا مەرزىمدە جەتكىزۋدى تالاپ ەتەتىن تاۋارلار نەگىزىنەن اۆتوكولىكپەن تاسىمالدانادى. سوندىقتان، قىتايدان ەۋروپاعا باراتىن جۇكتەردىڭ ەل اۋماعى ارقىلى ترانزيتپەن ءوتۋ كولەمىن ۇلعايتۋدىڭ ۇلكەن الەۋەتى بار»، - دەدى ول.
ۆيتسە- ءمينيستردىڭ اتاپ وتۋىنشە، الداعى ۋاقىتتا جىل سايىنعى تاسىمال كولەمى ءوسىمنىڭ ساقتالۋى كۇتىلەدى. 2029 -جىلعا قاراي ترانزيتتىك تاسىمالدار كولەمى 5 ەسەگە ارتىپ، 1 ميلليون توننانى قۇرايدى دەگەن بولجام بار. بۇعان، بيىلعى جىلى ەنگىزىلگەن ۆيزاسىز رەجيم جانە قىتاي مەن قازاقستان اۋماعى ارقىلى وتەتىن ەركىن ترانزيتكە مۇمكىندىك بەرگەن جاڭا كەلىسىم ىقپال ەتەدى.
«بۇدان باسقا، قىتاي تاراپى TIR Carnet ەۋروپالىق جەڭىلدەتىلگەن شەكارادان ءوتۋ جۇيەسىنىڭ مۇشەسى بولىپ قابىلداندى. ول كەدەندىك تەكسەرۋسىز ترانزيتتىك جول جۇرۋگە مۇمكىندىك بەرەدى. ءوز كەزەگىندە قىتاي ءترانزيتىنىڭ بولجانىپ وتىرعان 3 ەسەگە ۇلعايۋى جىل سايىن قازاقستان ەكونوميكاسىنا 263 ميلليارد تەڭگەگە جۋىق قاراجات ءتۇسۋدى قامتاماسىز ەتە الادى»، - دەدى ءساتجان ابلاليەۆ.
اۆتور
مارلان جيەمباي
