قىتاي قازاقتارى اراسىندا ەڭ كوپ تارالعان كىتاپتار

استانا. قازاقپارات - قىتايدىڭ شىينجاڭ ۇيعىر اۆتونوميالىق ولكەسىندە تۋعان اقىن-جازۋشىلار اراسىندا شىعارمالارى ەڭ كوپ باسىلعاندار كوشىن تاڭجارىق جولدى ۇلى، ومارعازى ايتان، جۇماباي ءبىلال، ورازحان احمەت باستاپ وتىر.

بۇل تۋرالى 2013 -جىلى «شينجاڭ» حالىق باسپاسى كورپوراسياسى باس رەداكتورىنىڭ ورىنباسارى ءشارىپحان ابدالي ۇلى قازاقپارات تىلشىسىنە بەرگەن سۇحباتىندا ايتتى.

ونىڭ ايتۋىنشا، اتالعان اقىن-جازۋشىلاردىڭ شىعارمالارى وسى ۋاقىتقا دەيىن باسپالاردان 4-5 رەتتەن جارىق كورگەن. ونىڭ ىشىندە اسىرەسە، اقىن تاڭجارىق جولدى ۇلىن ەرەكشە اتاپ وتۋگە بولادى. 1903 - جىلى 15 - ناۋرىزدا ىلە ايماعىنداعى كۇنەس اۋدانىندا ومىرگە كەلىپ، 1947 - جىلدىڭ 6 - تامىزىندا تۋعان جەرىندە دۇنيەدەن وزعان. ول 1935 - جىلى قىتاي قازاقتارىنىڭ تۇڭعىش باسپاءسوزى - «ىلە وزەنىن» شىعارۋدى ۇيىمداستىرىپ، 1940 - جىلدىڭ 2 - اقپانىنا دەيىن ونىڭ باس رەداكتورى قىزمەتىن اتقارعان جانە بەيىمبەتتىڭ «شۇعا» پەساسىن ساحنالاعان.

«شىينجاڭ ولكەسىندە تۋعان جاس اقىن-جازۋشىلاردىڭ ىشىندە ەڭ تانىمالى باۋىرجان شورماق پەن مادەنيەت مۇقاتاي. ال قازاقستاندىق قالامگەرلەردىڭ شىعارمالارىن شىعارۋ بىزدە ءالى ءبىر جۇيەگە تۇسپەگەن. وعان شەتەلدىك اۆتورلارعا قالاماقىنىڭ تولەنبەۋى جانە ولاردىڭ وزدەرى مەن شىعارمالارىن باسىپ شىعارعان قازاقستاندىق باسپالارمەن بايلانىستىڭ السىزدىگى ءوز ىقپالىن تيگىزىپ وتىر. دەگەنمەن وسى ۋاقىتقا دەيىن اباي قۇنانباي ۇلىنىڭ، مۇقاعالي ماقاتايەۆتىڭ، ءابدىجامىل نۇرپەيىسوۆتىڭ جانە تاعى باسقا دا ءبىرقاتار اقىن-جازۋشىلاردىڭ كىتاپتار جارىق كوردى»، - دەيدى ش.ابدالي ۇلى.

ونىڭ سوزىنە قاراعاندا، سوڭعى جىلدارى اۋدارما ءىسى جولعا قويىلىپ، مۇقاعالي ماقاتايەۆ سياقتى كەيبىر اقىن-جازۋشىلاردىڭ تۋىندىلارى قىتاي تىلىندە جارىق كورگەن. سونداي-اق، ءوزى دە قىزىعۋشىلىق ءبىلدىرىپ سايىن مۇراتبەكوۆتىڭ - ەكى، ديداحمەت ءاشىمحان ۇلىنان ءبىر اڭگىمەسىن اۋدارعان كورىنەدى.

اۆتور: ەرلىك ەرجان ۇلى (2013-جىل)