قىتاي كولىك ءوندىرىسىن ارتتىرادى
استانا. قازاقپارات- قىتاي بيىل ەلەكترموبيل ءوندىرىسىن ارتتىرماقشى. سەبەبى الەمدە بۇل ەلدە شىعارىلاتىن كولىكتەرگە سۇرانىس بارعان سايىن ۇلعايىپ كەلەدى. 2024 -جىلى كورشى مەملەكەتتە جاساپ شىعارىلعان ميلليونداعان اۆتوكولىك ساتىلدى.

ال 2025 -جىلى ەكسپورت كولەمى ايتارلىقتاي ەسەلەنەدى دەپ بولجانىپ وتىر. اۆتووندىرۋشىلەر سۇرانىستى وتەۋ ءۇشىن جاساندى ينتەللەكتىنى قولدانا باستاعان.
قىتايدىڭ ەلەكتروموبيل نارىعىندا 2025 -جىلى وندىرىسكە ەرەكشە ءمان بەرىلەدى. بۇعان الەمدە سۇرانىستىڭ ارتۋى تۇرتكى بولىپ وتىر. ءتىپتى كوپ بولعانى سونشالىق قازىر اۆتو زاۋىتتار الدىن الا تاپسىرىسپەن جۇمىس ىستەپ جاتىر. ماسەلەن، 2024 -جىلى ءاربىر ساتىلعان ەكىنشى كولىك توقپەن جۇرەدى. بىلتىر دۇنيەجۇزىندەگى جالپى ەلەكترلى كولىك ءوندىرىسىنىڭ 60 پايىزى قىتايعا تيەسىلى بولدى.
تەمىر تۇلپارلاردى ءوندىرۋ جانە ساتۋ جاعىنان 9 جىل قاتارىنان الدا كەلەدى. ەلدىڭ اۆتووندىرۋشىلەر قاۋىمداستىعىنىڭ مالىمەتىنە سايكەس وتكەن جىلدىڭ وزىندە قىتايدا 31 ميلليون كولىك ساتىلعان. ەندى جىلدان جىلعا ۇلعايىپ كەلە جاتقان سۇرانىستى وتەپ، تاپسىرىستى ۋاقىتىلى ورىنداۋ ءۇشىن كولىك جاساپ شىعاراتىن زاۋىتتار جاساندى ينتەللەكتىنى پايدالانادى. ياعني ەندى جاڭا كولىكتەردى قۇراستىرۋعا روبوتتار پايدالانىلادى. ال بۇل كولىكتەر ەكسپورتقا قازاقستان ارقىلى شىعارىلادى. ويتكەنى ءبىزدىڭ ەل ارقىلى ترانزيتتىك تاسىمال ءتيىمدى. ەڭ باستىسى كەز كەلگەن باعىتتا جىلدام جەتكىزۋگە بولادى.
ايتا كەتۋ كەرەك، بۇگىندە قىتايدان ەۋروپاعا جاسالاتىن جەر ءۇستى ترانزيتتىك تاسىمالدىڭ 85 پايىزعا جۋىعى قازاقستان اۋماعى ارقىلى وتەدى. سوندىقتان دا كورشىلەس ەكى ەل اراسىندا كولىك- ترانزيت سالاسىنىڭ دامۋىنا باسا ءمان بەرىلىپ كەلەدى.
داي چەنحاو، دامۋ جانە قىزمەت كورسەتۋ بيۋروسىنىڭ ديرەكتورى:
- بيىل ءوندىرىس كولەمى 30 پايىزعا دەيىن ارتادى. كولىكتەردىڭ باسىم بولىگى جاڭا بۋىندى بولادى. ءوندىرىس ورىندارى جاساندى ينتەللەكتىگە نەگىزدەلىپ جاڭعىرتىلادى. بۇل ءونىمدى ەسەلەۋگە مۇمكىندىك بەرەدى. بيىل 32 ميلليون دانا كولىك ساۋداعا شىعارىلادى بولجانىپ وتىر. ونىڭ 26 ميلليونى ىشكى نارىققا ساۋدالانسا، 16,5 ميلليون داناسى ەكسپورتتالادى دەگەن جوسپار بار.
قىتاي بيلىگى جوسپاردى جۇزەگە اسىرۋدا «ءبىر بەلدەۋ - ءبىر جول» جوباسىنا سۇيەنەدى. ال شەكارالاس مەملەكەت رەتىندە قازاقستاننىڭ بۇل باعىتتاعى ۇستانىمى بەلگىلى. ەلىمىز حالىقارالىق ماڭىزعا يە كولىك-لوگيستيكالىق توراپقا اينالۋعا كۇش سالىپ جاتىر. ونىڭ تيىمدىلىگىن تاراپتار جاقسى ءبىلىپ وتىر.
24.kz