قىتاي ش ى ۇ اياسىنداعى ىنتىماقتاستىقتى 8 باعىت بويىنشا ىلگەرىلەتپەك
تاشكەنت. KAZINFORM - قىتاي تاراپى تاشكەنتتە وتكەن دوڭگەلەك ۇستەل بارىسىندا شاڭحاي ىنتىماقتاستىق ۇيىمىنا (ش ى ۇ) ءتوراعالىق ەتۋ كەزەڭىندە اتقاراتىن جۇمىستاردىڭ جوسپارىمەن ءبولىستى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ءىس-شاراعا قاتىسقان قىتايدىڭ وزبەكستانداعى ەلشىسى يۋي جيۋن ۇيىم اياسىنداعى ىنتىماقتاستىقتى 8 نەگىزگى باعىت بويىنشا ىلگەرىلەتۋ كوزدەلگەنىن ايتتى.
- ش ى ۇ-نىڭ ساياسي سالماعى ارتا ءتۇستى. وعان مۇشە بولۋعا نيەتتى ەلدەر قاتارىنىڭ ارتىپ كەلە جاتقانىن وسىعان دالەل. قىتاي ءوز ءتوراعالىعى كەزىندە 8 باعىتتا ىنتىماقتاستىقتى جۇيەلى جولعا قويۋعا نيەتتى. اتاپ ايتقاندا، كەدەيلىك دەڭگەيىن تومەندەتۋ، ازىق-تۇلىك قاۋىپسىزدىگى، دەنساۋلىق ساقتاۋ، جوبالاردى ءتيىمدى قارجىلاندىرۋ، كليماتتىڭ وزگەرۋى، «جاسىل» تەحنولوگيالاردى ەنگىزۋ، يندۋستريالاندىرۋ جانە سيفرلىق ەكونوميكانى دامىتۋ. سونداي-اق، قىتايدىڭ توراعالىعىمەن 40-تان استام وتىرىس، ءتۇرلى فورۋمدار وتكىزۋ جوسپارلانعان، - دەدى يۋي جيۋن.
وتىرىس بارىسىندا ساياساتتانۋشىلار بىلتىر اياقتالعان قازاقستان ءتوراعالىعىنا جوعارى باعا بەرىپ، بارلىق باعىتتا بايلانىستاردى نىعايتا ءتۇسۋدىڭ ماڭىزىنا توقتالدى.
- ۇيىمعا مۇشە ەلدەردىڭ ءوزارا ءتيىمدى ديالوگى ش ى ۇ اياسىنداعى ىنتىماقتاستىقتى جوعارى دەڭگەيگە شىعاردى. بۇل رەتتە قازاقستان مەن وزبەكستاننىڭ ءرولى ەرەكشە. العاشىندا وڭىرلىك قاۋىپسىزدىك ماسەلەلەرىن شەشۋگە باعىتتالعان ۇيىم بۇگىندە ەكونوميكالىق دامۋعا ويىسىپ جاتىر. ماسەلەن، مەملەكەتتەر ازىق-تۇلىك قاۋىپسىزدىگىن قامتاماسىز ەتۋ جانە كولىك-لوگيستيكالىق جوبالاردى بىرلەسىپ ىسكە اسىرۋعا مۇددەلى. سوندىقتان ش ى ۇ- نىڭ الەۋەتى مول، - دەدى وزبەكستاندىق ساياساتتانۋشى مۋرات باحاديروۆ Kazinform ءتىلشىسىنىڭ ساۋالىنا جاۋاپ بەرە وتىرىپ.
ەسكە سالايىق، بىلتىر شىلدەدە استانادا وتكەن ش ى ۇ سامميتى بارىسىندا 25 قۇجاتقا قول قويىلدى. كوپتەگەن الەم ەلدەرى قازاقستاننىڭ ۇيىمعا ءتوراعالىعىن جوعارى باعالادى. ەلىمىزدىڭ باستامالارى ۇيىمنىڭ جۇمىسىنا سەرپىن بەردى.
سونىمەن قاتار، تاياۋدا تۇركيا ش ى ۇ- نىڭ تولىق مۇشەسى اتانۋعا نيەتتى ەكەنىن مالىمدەدى.
اۆتور
ءاليحان اسقار
