قىتاي ايعا ادام قوندىرۋ جوسپارىن تانىستىردى
استانا. KAZINFORM - قىتاي ايدى ادامنىڭ قاتىسۋىمەن زەرتتەۋ باعدارلاماسى اياسىندا «ەكى رەت ۇشىرۋ، اي وربيتاسىندا جاقىنداسۋ جانە ءتۇيىستىرۋ» ءادىسىن قولدانۋدى جوسپارلاپ وتىر. قازىر ايعا ادام قوندىرۋعا دايىندىق جۇمىستارى جوسپارلى تۇردە ءجۇرىپ جاتىر، دەپ حابارلايدى شينحۋا اگەنتتىگى.
قىتايدىڭ ادام قاتىساتىن عارىش باعدارلاماسى باس كونسترۋكتورىنىڭ ورىنباسارى ءارى ايدى زەرتتەۋ باعدارلاماسىنىڭ باس كونسترۋكتورى ۋاڭ شياڭ بۇل جوسپاردى بەيجىڭدە وتكەن ادام قاتىساتىن عارىشتىق ۇشۋلار جونىندەگى VII عىلىمي سيمپوزيۋمدا تانىستىردى.
جوسپارعا سايكەس، ەكى زىمىران ايعا قونۋعا ارنالعان «لانيۋە» مودۋلىن جانە «مەنچجوۋ» باسقارىلاتىن عارىش كەمەسىن جەر مەن اي اراسىنداعى اۋىسپالى وربيتاعا بولەك-بولەك شىعارادى. ودان كەيىن ەكى اپپارات اي وربيتاسىندا جاقىنداسىپ، تۇيىسەدى. عارىشكەرلەر «مەنچجوۋ» كەمەسىنەن «لانيۋە» قونۋ مودۋلىنە اۋىسىپ، اي بەتىنە تۇسەدى. سول جەردە عىلىمي-زەرتتەۋ جۇمىستارىن جۇرگىزەدى.
ۋاڭ شياڭنىڭ ايتۋىنشا، بۇل ءتاسىل قىتايدىڭ قازىرگى تەحنيكالىق مۇمكىندىكتەرى مەن ينفراقۇرىلىمىنا تولىق سايكەس كەلەدى. سونداي- اق عارىش كەمەسى مەن ايعا قونۋ ءمودۋلىن بولەك ازىرلەۋ اپپاراتتاردى جاساۋدى بىرىزدەندىرۋگە جانە ۇزاق مەرزىمدى كولىك قۇرالدارى جەلىسىن قالىپتاستىرۋعا مۇمكىندىك بەرەدى.
قازىر نەگىزگى عارىش اپپاراتتارىن - زىمىران-تاسىعىشىن، باسقارىلاتىن كەمە جانە قونۋ ءمودۋلىن ازىرلەۋ جۇمىستارى تۇراقتى ءارى ءساتتى ءجۇرىپ جاتىر.
ول ايعا ادام قوندىرۋ مەن ونى اۆتوماتتى اپپاراتتار ارقىلى زەرتتەۋ ميسسيالارىنىڭ نەگىزگى تەحنولوگيالار، ينفراقۇرىلىم جانە كادرلىق قامتاماسىز ەتۋ تۇرعىسىنان ورتاق تۇستارى كوپ ەكەنىن اتاپ ءوتتى. سونداي-اق «چاڭە» ايدى زەرتتەۋ باعدارلاماسى اياسىندا قول جەتكىزىلگەن ناتيجەلەر ادام قاتىساتىن ميسسيانى جۇزەگە اسىرۋعا بەرىك نەگىز بولاتىنىن ايتتى.
ايتا كەتەيىك، جۋىردا ءۇندىستاننىڭ جاڭا بۋىن جەرسەرىگىن عارىشقا ۇشىرعانى حابارلاندى.
