قىتاي اسكەرى تايۆان اينالاسىندا جاتتىعۋلارىن باستادى
استانا. KAZINFORM - بەيسەنبى كۇنى تاڭعى ساعات 07:45-تە قىتاي حالىق-ازاتتىق ارمياسى (ق ح ا ا) تايۆان ارالىنىڭ اينالاسىندا بىرلەسكەن اسكەري جاتتىعۋلارىن باستادى. بۇل تۋرالى ق ح ر قورعانىس مينيسترلىگىنىڭ سايتىندا حابارلاندى.
وقۋ-جاتتىعۋلار تايۆان بۇعازىندا، تايۆان ارالىنىڭ سولتۇستىگىندە، وڭتۇستىگىندە جانە شىعىسىندا، سونداي-اق جزينمەن، ماتسزۋ، ۋتسيۋ جانە دۋنين ارالدارىنىڭ اينالاسىنداعى اۋدانداردا وتۋدە.
ق ح ا ا شىعىس جاۋىنگەرلىك قولباسشىلىق ايماعىنىڭ باسپا ءسوز حاتشىسى لي سي ءمالىم ەتكەندەي، 23-24-مامىر كۇندەرى جاۋىنگەرلىك قولباسشىلىقتىڭ اتالعان ايماعىنىڭ قۇرلىقتاعى اسكەرلەرى، اسكەري- تەڭىز كۇشتەرى، اسكەري- اۋە كۇشتەرى جانە زىمىران كۇشتەرىنىڭ اسكەري قىزمەتكەرلەرى «بىرلەسكەن وتكىر قىلىش-2024» كود اتاۋىمەن بىرلەسكەن وقۋ- جاتتىعۋعا قاتىسادى.
ونىڭ ايتۋىنشا، وقۋ- جاتتىعۋ بارىسىندا اسكەري- تەڭىز كۇشتەرى مەن اسكەري- اۋە كۇشتەرىنىڭ بىرلەسكەن پاترۋلدىك قىزمەتى، ۇرىس دالاسىندا جان-جاقتى باقىلاۋ قۇقىعىن بىرلەسىپ يەلەنۋ جانە نەگىزگى نىساندارعا ءدال سوققى بەرۋ جۇمىستارى باستى نازاردا بولادى. ول وقۋ- جاتتىعۋ كەزىندە ق ح ا ا اسكەري كەمەلەرى مەن ۇشاقتارى پاترۋلدەۋ ءۇشىن تايۆان ارالىنىڭ اينالاسىنداعى اۋداندارعا جاقىندايتىنىن جانە ق ح ا ا- نىڭ شىعىستاعى جاۋىنگەرلىك قولباسشىلىعىنىڭ ناقتى جاۋىنگەرلىك مۇمكىندىكتەرىن سىناۋ ءۇشىن ارال ىشىندە جانە ودان تىس بىرلەسكەن جاۋىنگەرلىك كەشەندى وپەراتسيالار جۇرگىزىلەتىنىن قوسىپ ايتتى.
اۆتور
زارينا تۋعانبايەۆا
