قىتاي: ا ق ش- تىڭ وكتەمدىگىنە جول بەرە المايمىز

استانا. KAZINFORM - ا ق ش- تىڭ قىتايعا قارسى %-104 كولەمىندە باج سالىعىن قولدانىسقا ەنگىزۋىنە بايلانىستى قىتاي سىرتقى ىستەر مينيسترلىگى رەسمي بەيجىڭنىڭ ءوز مۇددەسىن قورعاۋ ءۇشىن باتىل ءارى پارمەندى شارالار قولدانۋدى جالعاستىراتىنىن مالىمدەدى. بۇل تۋرالى سينحۋا اگەنتتىگى حابارلادى.

ا ق ش پرەزيدەنتى دونالد ترامپتىڭ «ءوزارا تاريفتەر» ەنگىزۋ تۋرالى شەشىمى 9 -ءساۋىر كۇنى تۇستە رەسمي تۇردە كۇشىنە ەندى. سوعان سايكەس قىتايدان جەتكىزىلەتىن تاۋارلارعا قوسىمشا %104 باج سالىعى سالىنادى.

قىتاي سىرتقى ىستەر مينيسترلىگىنىڭ رەسمي وكىلى لين جيان بۇگىنگى بريفينگىدە قىتاي حالقىنىڭ دامۋ جولىنداعى زاڭدى قۇقىقتارىن تابانعا تاپتاۋعا، قىتايدىڭ ەگەمەندىك، قاۋىپسىزدىك جانە دامۋ مۇددەلەرىنە قول سۇعۋعا جول بەرىلمەيتىنىن اتاپ ءوتتى.

لين جيان  ا ق ش- تىڭ قىتايعا سالىناتىن باج سالىعىن وكتەمدىكپەن كوتەرىپ، شەكتەن تىس قىسىم جاساۋعا بەل بۋىپ وتىرعانىن سىنعا الدى. ونىڭ ايتۋىنشا، مۇنداي وكتەمدىك پەن الىمجەتتىككە قىتاي ءۇزىلدى-كەسىلدى قارسى تۇرادى جانە جول بەرمەيدى.

سونداي-اق ونىڭ پىكىرىنشە، ا ق ش ساۋدا جانجالدارىن شىنىمەن ديالوگ جانە كەلىسسوز ارقىلى شەشكىسى كەلسە، تەڭ قۇقىلىق، ءوزارا قۇرمەت جانە ءوزارا تيىمدىلىك قاعيداتتارىن ۇستانۋعا ءتيىس.

- ەگەر ا ق ش ەكى ەل مەن حالىقارالىق قاۋىمداستىقتىڭ مۇددەسىنە پىسقىرىپ قاراماي، تاريفتىك قاقتىعىس پەن ساۋدا سوعىسىن جالعاستىرۋعا نيەت ەتسە، قىتاي قالايدا سوڭىنا دەيىن تاباندىلىق كورسەتەدى، - دەدى ول.

ا ق ش- تىڭ «ءوزارا تاريفتەر» ساياساتى بويىنشا سوڭعى باج سالىقتارى كۇشىنە ەنگەننەن كەيىن، قىتاي تاراپى قازىرشە قارسى شارالار قولداناتىنىن مالىمدەگەن جوق. دەگەنمەن، قىتاي مەملەكەتتىك كەڭەسىنىڭ اقپارات كەڭسەسى سارسەنبى كۇنى تۇستەن كەيىن «قىتاي- ا ق ش ساۋدا قاتىناستارى تۋرالى قىتاي تاراپىنىڭ ۇستانىمى» اتتى اق كىتاپ جاريالادى. قۇجاتتا ساۋدا سوعىسىندا ەش ەلدىڭ جەڭىسكە جەتپەيتىنى، قىتاي مەن ا ق ش اراسىندا ساۋداعا بايلانىستى كەلىسپەۋشىلىك پەن شيەلەنىستەردىڭ بولۋى قالىپتى قۇبىلىس ەكەنى اتاپ ءوتىلىپ، ماسەلەنى كەلىسسوز ارقىلى لايىقتى شەشۋ قاجەتتىگى باسا ايتىلعان.

بۇعان دەيىن قىتاي ا ق ش تاريفتەرىنە بايلانىستى د س ۇ كولەمىندە تەكسەرۋ جۇرگىزىلۋىنە باستاما كوتەرگەنىن جازعان ەدىك.

اۆتور

ەرلان مازان