قىتاي ا ق ش-تان سۇيىتىلعان تابيعي گاز ساتىپ الۋدى توقتاتتى

استانا. KAZINFORM - امەريكانىڭ سۇيىتىلعان تابيعي گازى يمپورتىنىڭ توقتاتىلۋى ا ق ش پرەزيدەنتى دونالد ترامپتىڭ العاشقى مەرزىمىندەگى جاعدايدى قايتالايدى، دەپ حابارلايدى DW.

ا ق ش-تان سۇيىتىلعان تابيعي گاز يمپورتى قىتايعا ون اپتادان استام ۋاقىت بۇرىن تولىعىمەن توقتادى، دەپ حابارلادى 18-ءساۋىر كۇنى لوندوننىڭ The Financial Times (FT) گازەتى كەمە قاتىناسى دەرەكتەرىنە سىلتەمە جاساپ. باسىلىمنىڭ اتاپ وتۋىنشە، بۇل قىتاي مەن ا ق ش اراسىنداعى ساۋدا سوعىسىنىڭ ەنەرگەتيكا سالاسىنا دا تارالعانىن كورسەتەدى.

6- اقپاندا تەحاس شتاتىنىڭ كورپۋس- كريستي قالاسىنان شىققان، 69 مىڭ توننا سۇيىتىلعان تابيعي گاز تاسىمالداعان تانكەر قىتايدىڭ وڭتۇستىگىندەگى فۋجيان پروۆينتسياسىنا كەلگەننەن كەيىن ەكى ەل اراسىندا جاڭا جەتكىزىلىمدەر بولماعان. ەكىنشى تانكەر قىتايدىڭ 10- اقپاندا امەريكالىق سۇيىتىلعان تابيعي گازعا 15 پايىزدىق تاريف ەنگىزۋىنەن كەيىن ۇلگەرمەي، بانگلادەشكە باعىتتالعان. سودان بەرى تاريف 49 پايىزعا دەيىن ءوستى، بۇل امەريكالىق گازدى قىتايلىق ساتىپ الۋشىلار ءۇشىن ەكونوميكالىق تۇرعىدان ءتيىمسىز ەتتى.

ا ق ش پرەزيدەنتى دونالد ترامپتىڭ العاشقى مەرزىمىندە دە جەتكىزىلىمدەر ءبىر جىلدان استام ۋاقىتقا توقتاتىلعان بولاتىن. الايدا قازىرگى قاقتىعىس اۋقىمدى سالدارعا اكەلۋى مۇمكىن - ول قىتاي مەن رەسەي اراسىنداعى ەنەرگەتيكالىق ىنتىماقتاستىقتى نىعايتىپ، ا ق ش پەن مەكسيكادا سالىنىپ جاتقان كوپ ميللياردتىق سۇيىتىلعان تابيعي گاز تەرمينالدارىنىڭ كەڭەيۋىنىڭ ورىندىلىعىنا كۇمان تۋعىزادى.

پەسسيميستىك بولجامدار

Kpler كومپانياسىنىڭ اناليتيگى دجيلليان بوككارانىڭ ايتۋىنشا، جاقىن ارادا ەكى ەل اراسىنداعى ساۋدانىڭ قالپىنا كەلۋىنە نەگىز جوق.

- وتكەن جولى تولىق توقتاۋ قىتاي بيلىگى كومپانيالارعا تاريفتىك جەڭىلدىك بەرگەنگە دەيىن جالعاسقان ەدى، ءبىراق ول كەزدە گازعا سۇرانىس قارقىندى ءوسىپ جاتقان. قازىر ەكونوميكا باياۋلاپ جاتىر، ءبىزدىڭ باعالاۋىمىزشا، قىتاي بۇل جەتكىزىلىمدەرسىز ۇزاق ۋاقىت بويى ءومىر سۇرە الادى، - دەپ ءتۇسىندىردى ول.

وسى اپتادا قىتايدىڭ رەسەيدەگى ەلشىسى جان حانحۋەي قىتايدىڭ رەسەيلىك سۇيىتىلعان تابيعي گاز يمپورتى كولەمىن ارتتىرۋى مۇمكىن ەكەنىن مالىمدەدى.

- مەن ساتىپ الۋشىلاردىڭ وتە كوپ ەكەنىن ناقتى بىلەمىن. كوپتەگەن كومپانيا رەسەيلىك جەتكىزۋشىلەرمەن بايلانىس ورناتۋ ءۇشىن ەلشىلىكتەن كومەك سۇراپ جاتىر. جەتكىزىلىمدەر ءسوزسىز ارتادى دەپ ويلايمىن، - دەدى ول.

قازىر رەسەي اۆستراليا مەن كاتاردان كەيىن قىتايعا ءۇشىنشى ءىرى سۇيىتىلعان تابيعي گاز جەتكىزۋشىگە اينالدى. سونىمەن قاتار ەكى ەل «ءسىبىر كۇشى - 2» جاڭا گاز قۇبىرىنىڭ قۇرىلىسىن تالقىلاپ جاتىر.

Energy Aspects كونسالتينگ كومپانياسىنىڭ ساراپشىسى ريچارد برونزدىڭ پىكىرىنشە:

- تاريفتەر ەمبارگو دەڭگەيىنە دەيىن كوتەرىلگەن سايىن، ساۋدا اعىندارىنىڭ قايتا قۇرىلۋىن بايقايمىز. سونىمەن قاتار ازيادا گازعا دەگەن سۇرانىس جالپى العاندا 5- 10 ميلليون تونناعا ازايادى دەپ بولجانىپ وتىر. بۇل ەۋروپاداعى گاز باعاسىنا ءسال دە بولسا تومەندەتۋشى اسەر ەتۋى مۇمكىن، - دەدى ول.

بۇعان دەيىن حابارلانعانداي، قىتاي مۇناي ىزدەۋدە ا ق ش- تان كاناداعا بەت بۇرىپ جاتىر.