قىسقى اڭشىلىق: پاۆلودار وبلىسىندا قانداي اڭدارعا قارۋ كەزەنۋگە بولادى

پاۆلودار. KAZINFORM - ەرتىس-بايان وڭىرىندە قىسقى اڭشىلىق كەلەر جىلدىڭ 15- اقپانىنا دەيىن جالعاسادى. اتالعان كەزەڭدە قويان، تۇلكى، قارساق اۋلاۋعا رۇقسات بەرىلگەن. ال قابان مەن ءسىبىر ەلىگىن اۋلاۋ 31-جەلتوقسانعا دەيىن عانا مۇمكىن بولادى.

Қысқы аңшылық: Павлодар облысында қандай аңдарға қару кезенуге болады
Фото: Kazinform\ЖИ

پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ مالىمەتىنشە، بيىل قىسقى كەزەڭدە اڭ اۋلاۋعا بەلگىلەنگەن ليميتتەر بىرنەشە جانۋار ءتۇرىن قامتيدى. اتاپ ايتقاندا، 4752 قويان، 382 تۇلكى، 102 قارساق، 42 قابان جانە 245 ەلىك اۋلاۋعا رۇقسات ەتىلگەن.

اڭشىلىققا شىعار الدىندا قانداي قۇجات قاجەت؟

اڭ اۋلاۋعا نيەتتى ازاماتتار وزىمەن بىرگە اڭشى كۋالىگىن، جانۋارلار دۇنيەسىن پايدالانۋعا رۇقسات قۇجاتىن نەمەسە اڭشىلىق شارۋاشىلىعى سۋبەكتىسىنەن بەرىلگەن جولدامانى الىپ جۇرۋگە مىندەتتى.

اتىس قارۋىن پايدالانىپ، اڭ اۋلاۋ ءۇشىن ازامات 21 جاسقا تولۋى كەرەك. ال اڭ اۋلاۋدىڭ رۇقسات ەتىلگەن وزگە قۇرالدارىن، اڭشىلىق يتتەردى نەمەسە اۋشى جىرتقىش قۇستاردى قولدانۋعا 14 جاستان باستاپ رۇقسات ەتىلەدى.

— قارۋ مەن پاتروندار ازاماتتىق قارۋ اينالىمى سالاسىنداعى زاڭناما تالاپتارىنا ساي بولۋى ءتيىس. تاسىمالداۋ كەزىندە قارۋ وقسىز كۇيدە جانە ارنايى قاپتا، كەيستە نەمەسە قاپتامادا بولۋى قاجەت. اڭشىلىق قاعيدالارىندا ءبىر رەت اڭ اۋلاۋعا شىققاندا الىپ جۇرۋگە بولاتىن پاترونداردىڭ ءبىرىڭعاي سانى بەلگىلەنبەگەن، — دەپ ءتۇسىندىردى اۋماقتىق ينسپەكسيا باسشىسى يساتاي ابرازاحوۆ.

سونىمەن قاتار وزەن قۇندىزىن، كامشاتتى، قاراكۇزەن مەن ونداترانى اۋلاۋ كەزىندە اتىس قارۋىن قولدانۋعا، پنيەۆماتيكالىق جانە لاقتىرعىش قارۋدى پايدالانۋعا تىيىم سالىنعان. ساۋىت تەسەتىن، تۇتاندىرعىش نەمەسە جارىلعىش اسەرى بار، سونداي-اق اۋىرلىق ورتالىعى ىعىستىرىلعان وقتارى بار پاترونداردى قولدانۋعا دا بولمايدى.

قاي اۋماقتاردا اڭ اۋلاۋعا تىيىم سالىنعان؟

اۋەسقويلىق اڭ اۋلاۋ اڭشىلىق القاپتارعا بەكىتىلگەن ۋچاسكەلەردە، جولدامادا كورسەتىلگەن اۋماق شەگىندە جانە جانۋارلاردىڭ ءتيىستى تۇرىنە بەلگىلەنگەن مەرزىمدەردە جۇرگىزىلەدى. سوندىقتان اڭشىلار اڭشىلىققا شىعار الدىندا ۋچاسكەنىڭ شەكاراسىن شارۋاشىلىق سۋبەكتىسىنەن ناقتىلاپ الۋى كەرەك.

ينسپەكسيا دەرەگىنشە، پاۆلودار وبلىسىندا باياناۋىل مەملەكەتتىك ۇلتتىق تابيعي پاركىنىڭ، «ەرتىس ورمانى» مەملەكەتتىك ورمان تابيعي رەزەرۆاتىنىڭ، « قىزىلتاۋ» جانە «ەرتىس وزەنىنىڭ جايىلماسى» مەملەكەتتىك تابيعي قاۋمالدارىنىڭ اۋماعىندا، سونداي-اق اڭشىلىق القاپتاردىڭ رەزەرۆتىك قورى جەرلەرىندە اۋەسقويلىق اڭ اۋلاۋعا تىيىم سالىنعان.

— اڭشىلىق قاعيدالارىن بۇزعاندارعا ق ر اكىمشىلىك قۇقىق بۇزۋشىلىق تۋرالى كودەكستىڭ 382-بابى جانە ق ر قىلمىستىق كودەكستىڭ 337-بابى بويىنشا جاۋاپتىلىق كوزدەلگەن، — دەپ ەسكەرتەدى يساتاي ابرازاحوۆ.

ياعني جانۋارلار دۇنيەسىن پايدالانۋ تالاپتارىن جانە اڭ اۋلاۋ قاعيدالارىن بۇزعانى ءۇشىن ەسكەرتۋ نەمەسە جەكە تۇلعالارعا 10 ا ە ك، شاعىن كاسىپكەرلىككە 25 ا ە ك، ورتا كاسىپكەرلىككە 50 ا ە ك، ءىرى كاسىپكەرلىككە 100 ا ە ك مولشەرىندە ايىپپۇل قاراستىرىلعان.

ەگەر اڭ اۋلاۋشى زاڭسىز اڭشىلىق ارقىلى تابيعات پەن جان-جانۋارعا وراسان زور شىعىن كەلتىرسە، ونىڭ جازاسى دا قاتاڭ بولادى. ونىڭ ىشىندە جارىلعىش قۇرىلعىلاردى نەمەسە جانۋارلاردى جاپپاي قىرىپ-جوياتىن وزگە دە قۇرالداردى، اۋە كولىگىن، اۆتو-موتوكولىك قۇرالدارىن، قاردا جۇرەتىن تەحنيكانى نە شاعىن كولەمدى كەمەلەردى قولدانىپ زاڭسىز اڭ اۋلاسا، 6 جىلدان 10 جىلعا دەيىنگى مەرزىمگە باس بوستاندىعىنان ايىرۋى جازاسى كوزدەلگەن. كەلتىرىلگەن زالالدىڭ كولەمىن سوت ايقىندايتىنىن ەسكەرۋ قاجەت. مۇنداي جاعدايدا سوتتالۋشىنىڭ مۇلكى تاركىلەنىپ، بەلگىلى بىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءۇش جىلعا دەيىنگى مەرزىمگە ايىرا وتىرىپ، ءۇش مىڭ ايلىق ەسەپتىك كورسەتكىشكە دەيىنگى مولشەردە ايىپپۇل دا سالىنۋى ىقتيمال. بۇدان بولەك قوعامدىق جۇمىستارعا تارتۋ، باس بوستاندىعىن شەكتەۋ جازالارى دا قاراستىرىلعان.

سوندىقتان اتۋعا تىيىم سالىنعان اڭ-قۇسقا قارۋ كەزەمەس بۇرىن، ءزىل باتپان جاۋاپكەرشىلىك بارىن ەسىڭىزدە ساقتاڭىز.

2027 -جىلدان باستاپ اڭ اۋلاۋ تارتىبىندە وزگەرىستەر بولادى

كەلەر جىلى اڭ اۋلاۋ وبەكتىلەرى بولىپ تابىلاتىن جانۋارلاردىڭ ليميتتەلەتىن جانە ليميتتەلمەيتىن تۇرلەرىنىڭ جاڭا تىزبەسى قولدانىسقا ەنگىزىلەدى. وعان ليميتتەلەتىن 17 جانە ليميتتەلمەيتىن 27 جانۋار ءتۇرى كىرگەن.

- ليميتتەلەتىن تۇرلەر قاتارىندا قاسقىر، قوڭىر ايۋ، قۇنۋ، بورسىق، سىلەۋسىن، قابان، كيىك، بۇلان جانە باسقا جانۋارلار بار. ال ليميتتەلمەيتىن تۇرلەر تىزىمىنە جانات ءتارىزدى ءيت، تۇلكى، اقكىس، ءتيىن، ور قويان، ءشىل، قۇر، قىرعاۋىل جانە وزگە دە تۇرلەر ەنگىزىلگەن، — دەپ قوستى ينسپەكسيا باسشىسى.

قازىرگى ۋاقىتتا پاۆلودار وبلىسى اۋماعىندا 36 اڭشىلىق شارۋاشىلىعى بار. ونىڭ 33- ءى اڭشىلىق شارۋاشىلىعىنىڭ 8 سۋبەكتىسىنە بەكىتىلگەن. ينسپەكسيا مالىمەتىنشە، ولاردىڭ جۇمىسىنا قاتىستى شاعىمدار تۇسپەگەن.

ەسكە سالا كەتەيىك، زايساندا زاڭسىز اڭشىلىققا قاتىسى بار دەگەن كۇدىكپەن 10 ادام ۇستالدى.

اۆتورلار

مۇرات اياعان