قىرعىزستاندا ىشكى ساۋدانى سوممەن جۇرگىزۋ ۇسىنىلدى
استانا. KAZINFORM - قىرعىزستاندا ەلدەگى تاۋارلار مەن قىزمەتتەر تولەمىن تەك سوممەن جۇزەگە اسىرۋ ۇسىنىلدى. ءتيىستى زاڭ جوباسىن پارلامەنت دەپۋتاتتارى قوعامدىق تالقىلاۋعا شىعاردى.
بۇگىنگى تاڭدا رەسپۋبليكادا ىشكى ساۋدانىڭ (جىلجىمايتىن مۇلىك، اۆتوكولىكتەر وپەراتسيالارى، نەسيە بەرۋ، تۋرلار ۇيىمداستىرۋ) شەتەل ۆاليۋتاسىندا جۇزەگە اسىرىلۋى ەلدىڭ ۇلتتىق ۆاليۋتاسى - سومعا قىسىمنىڭ كۇشەيۋىن بىلدىرەتىنى اتاپ ءوتىلدى. نەسيە بەرۋ جۇيەسىندە تۇرعىن ءۇيدى ءبولىپ تولەۋ ارقىلى ازاماتتار ەلدە ۆاليۋتا باعامىنىڭ كۇرت وزگەرۋى نەمەسە شەتەل ۆاليۋتاسىنىڭ ايىرباس باعامىنىڭ جاساندى ءوسۋى كەزىندە قارىزدارىن وتەۋدە قيىندىقتارعا ءجيى ۇشىرايدى.
وسىعان بايلانىستى زاڭ جوباسىندا سومنىڭ مارتەبەسىن كۇشەيتىپ، ەل ىشىندە ساۋدانى تەك ۇلتتىق ۆاليۋتادا جۇرگىزۋ ۇسىنىلادى. شەتەل ۆاليۋتاسىنداعى كىرىستەرى مەن شىعىستارى بار شارۋاشىلىق جۇرگىزۋشى سۋبەكتىلەر ەكسپورت پەن يمپورتقا بايلانىستى ساۋدا قىزمەتىن شەتەل ۆاليۋتاسىندا جۇزەگە اسىرا الادى.
بۇعان دەيىن قىرعىزستاننىڭ ۇلتتىق بانكى ەسەپتىك مولشەرلەمەنى 9 پايىز دەڭگەيىندە قالدىرعانى حابارلانعان بولاتىن.
اۆتور
ەركەجان سماعۇلوۆا
